豬年豬大晒！你數得出幾多個豬隊友？
一到豬年四周圍都係豬嘅擺設，其實卡通人物都有唔少豬角色，大家記得幾多個？
豬仔（Piglet）
小熊維尼嘅好朋友Piglet，1926年由作家A. A. Milne創作，其後迪士尼買下版權製作成卡通片。
豬仔天生好怕醜又超細膽，少少事都會嚇到佢彈起，不過最後佢都學會戰勝自己嘅恐懼，慢慢變得勇敢。
寶妮
「粉紅粉紅，趣緻的臉」睇到呢幾隻字有聲就代表你係80後啦！《飛天少女豬事丁》係日本動漫，1995年發行，主角國分果林係個女學生，因為遇上受父王命令到地球修行嘅東東而成為新一任寶妮，只要對變身鏡盒講咒語「愛心豬嘜變身」就可變身成寶妮，維持正義，仲要做108件好事去收集珍珠，基本上佢同超人一樣（不過係可愛豬女）。
麥兜麥嘜
身為香港人，點可以唔識得佢呢？原來麥兜同寶妮同年誕生！
佢仲有個表弟麥嘜，大家都係讀春田花花幼稚園，起初喺報章同兒童雜誌《黃巴士》連載，後來推出動畫更搬上大銀幕，內容夠生活化，而且對白生鬼，筆者到宜家都記得「常餐就係特餐，特餐就係快餐，快餐姐係常餐」呢句金句。
火腿（Hamm）
成日睇《反斗奇兵》都會見到佢，但佢叫乜名呢？「反斗奇兵隻豬」叫火腿，其實係豬仔錢罌嚟，佢對世事無所不知，好聰明㗎，同蛋頭先生（Mr. Potato Head）係好朋友。
Peppa Pig
2004年第一次喺英國電視台亮相，以超高速佔領兒童市場，10個小朋友11個都鍾意佢！
雖然無法理解點解個鼻喺右邊，但Peppa Pig一出，小朋友一定聽晒話，由於冇特別交代過佢背景，2004年佢過4歲生日，但2010年有報導指佢係5歲，根據推理，佢今年應該係6歲幾。
不理不理左衛門
《蠟筆小新》間中出現嘅角色，亦都係主角小新創作嘅作品，事實上佢係《蠟筆小新》已故作者臼井儀人嘅自畫像（完全係兩件事），不理不理左衛門係正義使者，多數喺劇場版電影出現。
豚豚
《火影忍者》嘅粉絲應該對佢唔會陌生，呢隻戴住珍珠頸鍊嘅豬，係綱手同靜音嘅寵物，佢唔單只係寵物咁簡單，佢嘅嗅覺特別靈敏，綱手逃走去邊都逃唔過佢個鼻，後來喺忍界大戰仲起咗好重要嘅作用。
豬小姐（Miss Piggy）
豬小姐係一個美國以布偶為主角嘅電視節目《大青蛙劇場》嘅其中一個角色，主角Kermit the Frog係佢伴侶。
Miss Piggy風情萬種，但內裡超兇悍仲精通空手道，千祈唔好激嬲佢！呢個角色一直保持知名度，後來更加同唔同時妝品牌合作，絕對係布偶界KOL。
豬八戒
《西遊記》入面唐僧嘅三個徒弟之一，本身係天庭統領八萬天河水兵嘅天蓬元帥，因為飲醉酒調戲嫦娥而被貶下凡間，投錯胎變成豬。因為係小說角色，所以佢冇一個好官方嘅造型，不過韓國有《西遊記》卡通片，而豬八戒角色都幾深入民心，筆者覺得黎耀祥演嘅豬八戒最經典。
彭彭（Pumbaa）
彭彭係《獅子王》入面嘅角色，佢仲有個好朋友丁滿同佢孖住出場，佢哋仲有單獨嘅動畫推出。
實際上彭彭係非洲疣猪，90年代呢套卡通片都幾紅，當時唔少小朋友都會跟住講「HAKUNA MATATA」。雖然佢外表好似好兇惡，但彭彭內心善良又熱情，係一隻好疣豬嚟㗎。
留言 1