吳鎮宇自覺性格孤僻　羨慕張家輝同導演傾得埋

麥兆輝執導由吳鎮宇、郭富城和任達華三大影帝主演的英皇電影《內幕》將於12月6日公映，日前吳鎮宇為電影宣傳受訪，戲中飾演一名執法人員，聯同演律師的郭富城（城城）去查案，二人繼電影《公元2000》之後相隔25年後再合作，鎮宇直言覺得城城更成熟：「見到真正嘅演員，佢係一個好演員，好多嘢會從演員角度出發。」他舉例城城為角色增肥長出肚腩及留鬚，動作戲又絕不猶豫。

今次鎮宇的角色設定不修邊幅，做事甩漏，初時會覺得好多臉部表情和動作有點多餘，但他相信麥兆輝肯收貨都不會太過分，便放膽去演：「睇番佢係無錯，我負責輕鬆啲部分。」他表示導演要求的就會去演，「開心導演可以壓得住我，會要求我點演，你就會放心畀佢，有時係咁。」他說想同新晉導演合作，以前覺得有問題會提出，笑謂「拗吓好似好威，而且通常都贏。」他覺得新導演有新體會，自己會盡量滿足不會拗，他會成日問新導演會否在劇本加插生死別戲增加感染力，像今次戲中任達和方中信角色便要死。

提到任達華不用替身親身上陣拍攝吊頸戲，鎮宇當日不在場，講笑若果在場會整蠱任達華剪斷威也，又指任達華親自上陣是無可厚非，只要有需要自己又應付得來，鎮宇都會肯拍。戲中他與張文傑（German）有場追逐戲便追到喘氣，「最乞人憎German話：要唔要慢啲就一就你？我話慢啲啲唔該晒，哈哈！咁個角色唔係英雄，體力追不上係啱，但唔好拋離太遠出咗鏡囉！」

今次與麥兆輝再合作，勾起以前拍《愛與誠》的開心回憶，鎮宇直言拍戲多年沒有既定電影班底，可能因為性格較孤辟，但性格如此也很享受，坦言羨慕張家輝跟名導好親密，他說：「家輝（張家輝）同啲導演好傾得埋，我係好羨慕，我現場都傾偈，佢哋就私下會約，開戲仲會從詳計議。」儘管羨慕還羨慕，鎮宇習慣照舊，同朋友也甚少來往，與好友劉青雲也是一年見一次面，笑言有些朋友三年才見一次面。

場地：Lubuds Group, FWD House 1881

髮型：Gary Poon

化妝：阿進

東網網站 : https://on.cc/東網Facebook專頁 : https://www.facebook.com/onccnews/