沈殷怡冧觀眾公開私密床照 自爆由「前夫」揸機

由沈殷怡（Shirley）、馮寶欣同葉巧琳主持的ViuTV新節目《海女日記》於上個月開播後討論度甚高，首兩集馮寶欣大方以泳衣上陣介紹潛水同趴龍舟，令觀眾眼睛大吃冰淇淋，點知去到第三集換上Shirley同葉巧琳主持後，兩位靚女似乎都太錫身，前前後後只是騷了3分鐘泳衣look，就一直著住Oversize白Tee做節目，搞到觀眾都大叫「唔夠喉」。

得知觀眾唔盡慶，Shirley都好識做日前在IG貼出一張泳照補數，仲話「擺明呃like行動過30k睇下有咩驚喜」。果然網民即時湧入like爆，令泳照累積超過3.6萬點讚，去到昨晚Shirley就「找數」貼出「30k的驚喜」，原來係一張瞓覺相，相中見到Shirley在熟睡狀態然後被低抄影住一個下巴，非常搞笑，她更留言：「超額完成，30k既驚喜就係之前拍既劇下個月播啦 附上我前夫幫我影既精美劇照一張 大家記得睇啦！」Shirley所指的「前夫」正正是MIRROR成員邱士縉（Stanley），皆因二人將在新劇《野人老師》飾演一對夫妻。

不過其實好戲在後頭，Shirley最後仲有一句「嗯⋯⋯⋯？唔收貨？咁swipe right啦 咁樣收貨喇掛」原來瞓覺相後面仲隱藏住一張泳照，Shirley仲賣大包微微烏低身，火辣到爆。