【余建在言】體育劇定睇肉劇 由Ian演《I SWIM》更稱身？
ViuTV今年其中一部重頭劇《I SWIM》，開拍時已經萬眾期待，到正式開播更加迎來洗版式力撐，大家又回到晚晚準時返屋企睇電視的日子，對上一齣應該是《IT狗》。
劇集受歡迎，除了因為有MIRROR成員呂爵安Edan、邱士縉Stanley、王智德Alton吸客外，新晉人氣男神魏浚笙Jeffrey也夠點綴，而且成功將《膠戰》中的傻氣帶到角色，演得自然。不過最重要一點當然是有能力由體育劇轉化做「睇肉劇」，一眾年輕小伙子個個得條泳褲仔，集集赤條條Show肌操水。雖然是最低成本的戲服，但肯定是最花血汗的造型。
是養眼的，亦是備受愛戴，但是否代表《I SWIM》好睇呢？全劇10集已播了一半，但似乎愈看愈發現有不足之處，首先故事背景設定在中學已經講不過去，Stanley與Alton分別都已經31及32歲，要二人演17、8歲的中六生，實在尷尬。當年周星馳都係29歲演《逃學威龍》扮中學生，情節上更大條道理被人質疑，喜劇不忘合理。其實將整個故事設定到大學學界比賽，係咪大家都舒服啲。
體育劇要好看，一是賣青春熱血，再不是就賣武俠式決鬥，綜觀《I SWIM》頭5集情節，是兩邊皆觸及但又未發揮到，遠的不作比較，就以同台的《男排女將》比，故事講一支丙組水兵隊伍，如何靠教練Stephy鄧麗欣，打到上乙組，每集為一位「問題球員」解決問題，大家看到的是隊員成長。至於《I SWIM》，明顯有成長的只有Jeffrey，但他的過程是武俠式的無師自通，話係就係欠感染力。再者《男排女將》入面，顧定軒與鄧麗欣的疑似師生戀，也比呂爵安跟吳海昕的來得流暢自然，有血有肉地培養出來，而非一來便情定終身一樣。
不過《I SWIM》最大的失誤或許是選角，雖則Edan人氣當旺有觀眾緣，但由喜感十足的他來演一個比賽第一，凡事堅執，對隊友帶點冷漠的運動員，全程就只見Edan努力去演，就是流於表面，而且無情且率直的說話語氣，無意間將他的咬字問題展露出來，是有點意想不到。反觀，看過他在《闔家辣》的演出，一個急功近利的年輕人，反而演得輕鬆自在，手到拿來。
題外話，如果要找一個人取締Edan演李馬榮，筆者覺得Ian陳卓賢是不二之選。首先他本身是運動員，有著那份基因去演繹角色，而且他曾經在節目中，玩遊戲都可以表現出認真和執著，在鏡頭前板起了面，那不正正是李馬榮所需的質感嗎？在缺乏演技培訓下，要演好角色得靠個人的經歷和個性。所以，對不起Edan，若將《I SWIM》交給Ian，相信會更稱身。
撰文︰余建
Facebook專頁︰https://www.facebook.com/Stupid.View
留言 18