許廷鏗被同事當眾批評　怒掟電話發洩再不合作

藝人許廷鏗（Alfred）自入行就被冠以「牙醫歌手」身份，後來更成為唱片公司老闆、飲食界KOL等多重身份。許廷鏗曾奪得「叱咤樂壇男歌手金獎」，事業如日中天，直到2021年與華納完約後，佢創立個人唱片公司「自許紀錄」，最近又成為匹克球教練，不過公開活動出席率大減，一度網民戲稱為「失蹤人口」。許廷鏗近日接受頻道訪問時，就揭開昔日曾因被同事當眾批評，怒扔電話發洩嘅激動場面，依家更與對方再不合作。

許廷鏗指自己當年出席《勁歌金曲頒獎典禮》攞獎，花大量心思改善表演，惟上台期間被煙霧嗆到，導致表現失準：「唱《青春頌》嘅時候有啲濁親，但冇人知。但要頂住佢，唔可以失禮。」其後許廷鏗出席慶功宴，一到場就發現氣氛奇怪：「我去到Joyce（鄭欣宜）嗰度嘅時候，我嚟到突然間氣氛好奇怪，嗰時有Joyce、同事喺度，諗住打邊爐。我同事出聲話：『其實你Perform得唔好！你冇盡到你嘅力。』」許廷鏗背負重任卻聽到同事批評，情緒崩潰到掟電話落牆：「唔知點解嗰吓一上頭，嗰日已經好攰，諗咗好多嘢希望成功，畀咗好多力令到呢件事可以扭轉到，唔係一個『金針雲耳』獎。我唔知點解，我完全控制唔到個情緒，我一部電話就車落去。好彩喺我同事身邊飛過去，『嘭！』撞咗落牆，電話跌落地。」

許廷鏗續指自己當時個人「呆咗」，但我同事就勁到執番起部電話，似冇受影響。許廷鏗解釋指自己當時好壓抑：「我做完表演，你都知難頂，係咪去到咁嘅狀態，你都要揶揄我呢？」並指與同事都「互相Push到大家嘅Standard都去到冇空間位置」如今已再冇同該位同事合作。

另外，提到當年突然離開華納，許廷鏗提到是華納主動提出解約：「嗰時大家都有agreement，個timing差唔多啦，我哋就輕鬆帶過啦。其實我嗰陣時叫做有啲震驚、都幾突然嘅，當我知道嘅時候，我內心當然好大反應啦。咁我就OK啦，好成熟處理，好似分手咁。我就諗以後嘅去向，嗰個階段嘅我好多人緊恭喜我，啱啱攞咗獎冇耐，二月嘅時候，就開始傾，就話要開始解約。」許廷鏗指攞獎後不久即解約是公司策略：「呢段期間捧咗一個人，Ok啦，功德圓滿，Quota夠咗，就到下一位。」許廷鏗承認當時心態不夠成熟：「當時有啲情感擺落去『我幫公司成績都唔差呀！』撇除呢度，係和平分手。」如今他理解公司決定係理性嘅，到後來經歷一段「混沌期」，先決心成立個人公司。

東網網站 : https://on.cc/東網Facebook專頁 : https://www.facebook.com/onccnews/