羅毓儀「女神夢」完結　突然成長經歷情緒過山車

藝人羅毓儀（Yuki）拍攝無綫戀綜《女神配對計劃》與林俊其成為CP，受到觀眾歡迎，節目近日剛完成拍攝，Yuki在社交網長文分享感受指自己好像變成童話世界《愛麗絲夢遊仙境》的主角愛麗絲一樣，經歷了許多，好似發了場夢，但這場夢正式在前日（4日）結束，她說：「呢段時間真係經歷咗好多嘢，認識咗好多新朋友，感受到好多嘅溫暖，受到了很多的照顧。短短呢幾個月發生嘅事情，令到我感覺好似經歷咗成年咁，所有嘢都濃縮咗喺幾個月發生晒。」

Yuki覺得近月好像突然成長了許多：「我喺呢段時間都成長咗好多，因為面對咗好多好多唔同嘅事情，有開心、唔開心、期待、緊張、焦慮、擔憂等等等等，經歷咗很多很多的情緒過山車，而且係呢段時間亦都反思咗好多，亦都做咗好多嘢。」

Yuki續說指：「冇人係完美的，我亦都知道我所做嘅事情係好多人嘅眼中都未必係最好，甚至乎係錯嘅，我曾經喺度諗，假如我唔係咁做嘅話結果會唔會好一啲？我唔知道，因為冇人會知道冇發生嘅事情到底係點，唔會知道平行時空嘅自己發生緊咩事，而且既然事情已經發生咗再去糾結亦都改變唔到。但係呢啲諗法並唔係一時三刻可以實行得到。因為就算知道個道理係咁，理性知道係咁，感性嘅自己亦都冇辦法將情緒置之不理。直到依家，我覺得我都未係好識得點樣去處理自己，但係我知道自己已經比以前變得更好，變得更強大，因為我身邊有你哋，多謝喺呢段時間一直陪伴住我嘅咁多位！Love you all !!!」

東網網站 : https://on.cc/東網Facebook專頁 : https://www.facebook.com/onccnews/