衛詩雅低成本製作、動力火車喜感十足！藝人潮玩鬼滅之刃cosplay！

由日本漫畫家吾峠呼世晴所創作嘅《鬼滅之刃》漫畫銷量超過一億本，電影版日本票房勁收15億，熱潮席捲全球！當中幾位主人翁造型夠晒標誌性，港台日明星個個都爭住cosplay，睇吓邊個扮得神似先？

撰文、圖片：東方新地

關智斌

被衛詩雅tag完請接招，Kenny都即刻找數扮富岡義勇，見佢成set造型非常認真，就連腳上對日式人字拖都襯埋，好嘢！

樂宜

有本錢仲有膽識真空cos甘露寺蜜璃嘅睇怕都係只得一個樂宜，不過就被網友質疑鬼影變幻球，當事人親自解畫，話心口開得太大，實在搵唔到胸墊喎！

陳家樂

陳家樂都有喺萬聖節應下節又順手挑吓老友衛詩雅機扮炭治郎，不過個尷尬笑容加埋支羽毛球拍，就被網民取笑扮緊張家輝：「你係唔係嚟搞笑？」

王友良

Cosplay 日本大熱《 鬼滅之刃 》點少得超級日本通同動漫迷王友良，有齊全套道具扮勻富岡義勇同炭治郎，好有誠意！

衛詩雅

大眼妹衛詩雅扮嘅禰豆子還原度高又可愛，最緊要隨手拿來阿妹粉紅絲帶做頭飾、有味沖涼毛巾變和服，再加埋條九龍城街市茅根竹蔗，低成本得嚟仲好有創意㖭！

蔣家旻

連配角蟲柱蝴蝶忍都有忠實粉絲蔣家旻，自認雖然唔夠主角戰鬥力強又唔夠禰豆子可愛，不過自己就中晒毒，童心返晒嚟！

孫慧雪

38歲人妻孫慧雪都好 In玩埋一份，又係扮大熱禰豆子，可愛少女味十足。雪雪原來都係《 鬼滅之刃 》忠粉，除咗集集追，仲買埋玩具自己砌自己上色！

S.H.E. Selina

《 鬼滅之刃 》忠粉仲有啱啱過咗39歲生日嘅台灣天團組合S.H.E. 成 員Selina，出街食飯見到有條竹就擺入口扮禰豆子，Selina 話：「看到竹子我就受不了！」

三上悠亞

AV 女優三上悠亞都有份扮禰豆子，雖然密密實實，不過網友算係好寬容，個個讚佢神還原！

波多野結衣

同樂宜嘅貨不對辦鬼影變幻球相比，AV 女神波多野結衣嘅甘露寺蜜璃就貨真價實得多，亦都係眾多 cos 星當中，最受漫畫迷推崇大讚最神還原嘅一個。

動力火車

個個都出盡法寶玩 cosplay，動力火車係就係求其啲玩 P 圖，不過兩個加埋成百歲嘅大男人，玩起動漫仍喜感十足，最爆笑係禰豆子造型竟然同顏志琳零違和感！