m18講場：社區驚現上市銅鑼　神秘人連日運送

上市金鑼對交易港股嘅投資者並不陌生，尤其係熱愛抽新股嘅投資者，但相信大部分嘅人只係隔住螢幕見到。不過，近日有神秘人偷偷咁將上市金鑼，由金融大會堂搬落社區，到底邊個咁大膽，又到底搞邊科？

事緣香港交易所(00388)今年上市25周年，為咗與眾同樂，特意將平時只會喺上市儀式現身嘅金鑼，下周五(20日)至7月3日，坐住「金鑼巡邏號」出巡，去中環、西九、鰂魚涌、沙田、將軍澳、灣仔、啟德、葵涌及尖沙咀共9個地方。想近距離同金鑼打卡嘅朋友，「機會嚟喇，飛雲」！

周年紀念又點止咁簡單，呢架「金鑼巡邏號」仲係一個流動展覽，挑選咗標誌性嘅香港金融博物館展品展出，包括歷史檔案、照片片、影片、活躍於二十世紀八十年代嘅「紅衫仔」等，除咗打卡，大家更可以了解香港證券市場嘅發展變遷。同時設有互動遊戲，考考參加者對香港股市嘅了解，唔熟書唔緊要，睇吓展覽補習，掂晒！

個鑼落咗區，咁上市儀式會唔會無鑼敲？放心，無論係金鑼定上市管線，貨源充足。據悉，金鑼巡邏係行政總裁陳翊庭(Bonnie)諗出嚟，希望可以拉近港交所與香港人、社區嘅聯繫，兼且落手落腳將想法化成活動，做埋「金鑼搬運工」添！

財經