劉俊謙難忘6層樓高拍跳樓　董瑋隔28年吊威也：試一次驚一次

發布於 2024年09月12日08:48 • 機

劉俊謙難忘6層樓高拍跳樓；董瑋隔28年再吊威也。

由劉俊謙、董瑋（Dee哥）、伍允龍（Philip）、蔡思韵主演的電影《武替道》將於9月26日上映。電影一連入選四個海外影展，包括第44屆夏威夷國際電影節、香港國際電影節「⁠香港電影新動力2024 光影浪潮」東京站、大阪站以及福岡站。

劉俊謙、董瑋合作主演《武替道》。

劉俊謙在戲中飾演一位對港產動作片，充滿熱誠的年輕武師李世龍，需要應付多場動作戲，當中一場就挑戰在油麻地鬧市拍攝槍戰。阿謙對於當日武師團隊效率極為欣賞：「電影預算所限，嗰朝基本上好短時間就完成一整場槍戰戲，一個上晝就拍咗差唔多超過100個鏡頭，好難忘嘅係自己從未試過喺咁短時間內完成，成個拍攝進度、速度要更快，但係動作指導海哥（江道海）好好，手足又好清楚自己要啲咩，自己就好努力跟住去執行。」

劉俊謙挑戰在油麻地鬧市拍攝槍戰。

為電影擔任武指的江道海表示這場槍戰是與時間競賽，他特別感謝一眾手足：「因為只有一日可以拍，但係嗰場戲又確實需要好多鏡頭嚟表達，雖然動作唔係好複雜，但係中間又有路人走位又有槍戰動作，係需要好嘅配合，唯一好處就係我哋當日嘅演員除咗主演之外，都係用咗武師嚟演出，而我哋喺拍攝之前就去到現場多次綵排，肯定每個人都知道自己當日要做嘅嘢，所以可以喺咁短嘅時間完成呢一場戲。非常好彩嘅就係我哋連汽車撞裝修架，都係能夠一take完成，而且冇人受傷。」海哥為影壇資深動作指導，曾參與《旺角卡門》、《天下無賊》、《雙子神偷》等作品，亦為90年代多套賭片，包括《賭神》擔任賭術指導。

伍允龍亦有份演出。

另一場令劉俊謙難忘的戲份是6層高的跳樓戲，拍攝時都有點膽戰心驚：「我本身就冇畏高，但企上6樓拍攝都有啲怯，因為就算有『威也』（wire）吊住，始終自己人生都冇試過企喺大廈嘅邊邊，望住樓下咁高，然後之後自己要跳落去。」阿謙成功克服恐懼，更連拍幾次跳樓場面，他指最辛苦是一班手足：「我就咁跳落去都係做少少跳樓反應，最難嘅反而係啲拉『威也』嘅師兄，即係點樣放『威也』啊，『威也』放到去邊度要勒住拉啊。」

劉俊謙難忘拍攝6層高的跳樓戲。

戲中飾演「森哥」的董瑋（Dee哥）亦挑戰自我拍攝跳樓戲，他跟阿謙不約而同認為最辛苦是一班拉「威也」的手足。今年踏入70歲的Dee哥透露拍攝前自己都有點怯，皆因這次是他28年來再度「吊威也」，但最後只需3個take就完成拍攝：「喺條件有限之下，都無咩辦法去試或者夾啊，仲有一個原因，就係真係好『很』高啦，試一次驚一次啦咁，咁不如直接演啦。」

董瑋直言「試一次驚一次」。

Dee哥憶述上次吊威也已經超過20年，當年擔任武指的他跟劇組到內地拍戲，臨時拉伕要被「吊威也」：「當時因為要拍一個比較複雜嘅鏡頭，要吊住『威也』去拍攝要揸機 hand held（徒手持機拍攝），又因為係臨時決定去拍呢個鏡頭，而當時我哋器材方面，冇一啲叫做陀螺儀嘅物體，或者係而家較好嘅器材，咁就一定要有個攝影師吊喺空中拍，咁冇理由叫個攝影師上去㗎，咁就惟有我自己揸機，畀啲手足吊我上去拍啦。」

Dee哥上次吊威也已是28年前。