佘詩曼自爆一放假就癲　忽認戀情：冇停過拍拖喎！

視后佘詩曼（阿佘）近日接受訪問，談到過往演出劇集中最喜歡的角色，阿佘坦言每個角色都要鍾意才能演得出來，否則不會接拍：「不過講我想成為邊個角色啦，我最鍾意《公主駕到》，首先係公主，而且好正，又任性又刁蠻又靚，又有好多人錫，但我現實生活唔可以咁任性，我係隱藏版（任性），但佢係外露版，如果現實中係咁好正，最後又搵到真心相愛嘅駙馬，係好完美嘅事。（你鍾意童話故事？）個個女仔都係。」至於最富挑戰性角色，她則認為是最近拍攝的《正義女神》：「劇中我係飾演法官，喺《新聞女王2》之前拍攝，係一個特別情況，當時諗住全程投入準備《新聞女王2》，點知有個咁好嘅角色同劇本，我要好短時間將自己去調整，之前已經入晒腦係Man姐（《新聞2》角色名），依家要洗腦，完全唔可以有Man姐嘅影子。」

另外，問到阿佘若不當演員會做甚麼時？阿佘即時被考起：「嘩，點知呀，呢個係命運安排。」她笑言：「我諗我會做咗一個媽咪囉，我經理人擰晒頭喎，冇嘢可以做到咁慘？因為我係唔可以做一啲日日一樣，朝九晚五嘅工我係唔得嘅，咁可能做媽咪都未必得，我唔可以停落嚟，我一放假就癲，放得太耐假就覺得好無聊，人生冇晒意義同好廢，周身唔聚財，可能我會係旅行嗰啲美食家。」

最後講到感情問題，阿佘竟然表示：「我冇停過拍拖喎！」及後才解釋：「我係同我嘅工作談戀愛，每一個劇集就係我嘅對象，好投入同去揣摩，都已經好多精力，係我去愛上我個角色，其實個過程係好浪漫。（會唔會人格分裂？）我係有，其實我係唔係好正常，我覺得演員都唔係好正常，正常人做唔到演員，你成日一時一樣，點樣會係一個正常人。」

東網網站 : https://on.cc/東網Facebook專頁 : https://www.facebook.com/onccnews/