FI專欄｜笑到背脊拉親嘅棟篤笑｜人頭馬

香港人生活壓力大，間唔中都要搵啲活動回血，唔係真係捱到斷氣。

我好彩，靠朋友人脈撲到一張Jimmy O. Yang嘅stand-up飛，仲要係父親節嗰日！屋企幾位大帝好有型，話父親節應該放低責任去做自己鍾意嘅事，於是我一啲心理負擔都冇，笑住入場。

我由細到大都係stand-up comedy嘅粉絲，由子華神嘅經典金句，到Jimmy Carr嘅毒舌、Daniel Sloss嘅暗黑笑料，近年仲有喺內地爆紅嘅付航。睇stand-up係我嘅終極減壓神器，可惜自從子華神金盆啷口後，香港好少有大型stand-up show。點知上個星期，Jimmy O. Yang喺紅館一連五場，簡直係救贖我嘅低潮人生。

講真，呢場show真係好正！成個表演冇冷場，起承轉合做到滴水不漏，笑點同故事首尾呼應。我有一刻笑到太勁，背脊好似拉傷咁，差啲要搵跌打師傅救命。作為一個移民多年嘅港人，Jimmy有佢獨特嘅世界觀，句句hit中香港人嘅心坎，無論係講文化差異定係身份認同，都draw到全場觀眾嘅共鳴。入場嘅朋友，應該係零負評返家。

Jimmy好貼心，講嘅英文簡單易明，會考listening合格嘅朋友都無壓力，仲刻意加插大量廣東話元素，簡直係為香港人度身訂做。

佢仲提到一個城中powerful family搵佢攞飛，點知Jimmy霸氣回一句：「I don’t give a fuck, comedy is for people!」呢句話喺我腦海loop咗成晚，夠晒型！

而家喺亞洲睇演唱會定show，普通人總有個宿命：正價飛買唔到，網上搶飛又唔夠啲robot爭。想睇好show唯有幫襯黃牛。

好彩今次靠朋友救我一命，唔使同黃牛打交道。不過Jimmy嘅show畀我一個啟示：人生好似一場stand-up，唔係個個有神裝起跑，但只要你搵到屬於自己嘅笑點，肯為自己嘅快樂出招，冇人可以攔得住你嘅舞台。

笑完一晚，我覺得，CV薄過銀包又點樣？有得笑，就有得贏。

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen