李佳芯投入角色陷崩潰　黎諾懿拍動作戲膊頭受傷

藝人黎諾懿、李佳芯（Ali）主演的馬來西亞劇集《義和》播出以來話題十足，二人飾演的江湖人物，一洗7年前劇集《BB來了》的新手爸媽象，劇中不乏追車、講數、槍戰、打鬥等動作刺激場面。不過，鏡頭背後，兩位主角皆付上「代價」。

扮演江湖大嫂「冰姐」的Ali為投入角色，數月來沉浸在陰沉的情緒中，幾乎崩潰，她說：「冰姐係一個好多經歷嘅人，老公過身、擔起社團責任，又要打、撞車，仲要有聲嘶力竭咁喊嘅戲份，大部分都係沉重場口，對演員嚟講係好慘，開機拍攝前嘅準備，連埋拍攝，幾個月都要沉溺呢種情緒。好彩暫時呢幾年，我都係一年一劇，有足夠嘅體力同精神去應付，雖然係沉重，但係演繹上係過足戲癮，因為正常人生好難會做到呢啲嘢！」Ali劇中的人設與現實反差極大，她說：「其實飲酒、食煙，出入夜場，對現實生活嘅我已經係反差，不過講最大反差就係『氣場』，外人可能覺得我好硬淨，但我覺得自己唔係好有氣場，我個底蘊係順其自然，所以同冰姐一出場就要好壓場，喝一聲啲人就靜晒個氣場，好大反差。」

劇中連場打戲的黎諾懿表示：「今次有好多古惑仔打鬥戲，有好多拳腳、動刀，最驚險係用到真嘅鐵刀、鐵剷，要拍啲斬人戲份，真係要好小心，記得其中一個演員打完之後，佢成手都係血，因為佢畀個鐵剷整親。」諾懿亦因為拍攝打戲膊頭嚴重受傷，他說：「本身右邊膊頭有舊患，而為了應付大量打戲，搞到靭帶撕裂咗九成，依家仲醫緊，未完全康復，今次真係瞓身演出。」問到諾懿今次飾演古惑仔可有向老友鄭伊健取經？他自言角色表面斯文，但內𥚃兇狠，是一位渴望洗白的古惑仔，故沒有任何角色可參考。

東網網站 : https://on.cc/東網Facebook專頁 : https://www.facebook.com/onccnews/