宣萱拒微整形怕上癮　靠勤力拖慢老化

藝人宣萱事隔廿多年為電影再扮演「烏廷芳」角色，網民激讚她沒有走樣，好似吃了「防腐劑」一樣凍齡。她則稱是靠勤力延緩衰老，為了力保純天然樣貌，加上怕上癮，不願踏出微調第一步。

演員宣萱與朱鑑然在電影《尋秦記》中扮演兩母子，但戲外卻似兩姊弟，保養得宜的宣萱難怪被網民讚像吃了「防腐劑」一樣，多年沒有走樣。宣萱則稱有賴科技指畫面和相片現在可以執得好靚：「有啲嘢都冧緊，自己就盡量用自然方法拖慢老化，自己冇養生，大家都知我夜瞓，盡量勤力啲，早晚都會喺洗手間用個半鐘護膚、敷面膜、眼膜，仲要刮面。」外間欣賞宣萱優雅地老去，她則覺得也只能接受，希望盡力保持純天然：「聽啲人講只要做一次微調（微整形）就會上癮，情願唔好去行第一步，將來唔知會唔會，少少微調都可以接受，大執就一定唔會。」

電影以當年劇集片段拉開序幕，令宣萱勾起很多回憶，她說：「拍劇嗰陣所謂嘅苦，當年內地環境好差，我病到瞓咗一個星期醫院，但係一出院就見到張通告黐咗喺門口，聽朝四點鐘化妝，使唔使咁殘忍，佢哋話已經拍到冇嘢拍。」而宣萱與古仔的互窒整蠱NG片更是網民最愛，她說：「以前試過拍咗兩日通宵戲，我打個喊露，佢一隻手指插入我個口度，現場啲人嚇到死，佢對住我應該係最放肆，因為知我唔會嬲。有啲人有時聽到佢咁同我講嘢嘅，我又冇唔舒服嘅，我哋不嬲都係咁講嘢，對住佢都冇乜底線，真係識得太耐、太熟。」

朱鑑然片中扮演古天樂的兒子，對手戲不少，他坦言拍攝時有壓力：「老闆嘛，但係其實最大壓力都係自己畀自己，諗得太凝重，慢慢就放得輕啲。」至於，電影會否開續集，宣萱則認為要看票房：「當然唔好拍到佢爛，以往好多電視劇都係，收得就繼續拍，好似《賭場風雲》叫我拍第二輯，我話唔開喇，因為都冇嘢寫，要見好就收，最靚就要停。但係《尋》就唔同，因為穿越可以好多嘢玩，可以亂嚟。」

宣萱

Make up: Will Wong

Hair: Keith Wo

朱鑑然

Make up: Will Wong

Hair: Keith Wo

東網網站 : https://on.cc/東網Facebook專頁 : https://www.facebook.com/onccnews/