陳朗昇康體通帳戶無法訂場 康文署：不評論個別個案

【獨媒報導】前記協主席陳朗昇日前在社交媒體發文，指無法透過「SmartPLAY 康體通」預訂球場，曾致電康文署查詢，「調查」至今兩個月仍未有回覆。康文署回覆《獨媒》表示，不評論個別個案。陳朗昇向《獨媒》表示，康文署的回應「精彩」，認為自己被列入黑名單：「都幾明顯㗎喇，我當咗係。」他坦言感到不開心，「帶來生活上好大不便又不是嘅，但原則上咁樣剝奪一個人租場自由，係咪可以咁樣呀？」

陳朗昇於上週五（6月20日）在社交媒體 Facebook 上載一條影片，顯示其帳戶無法透過「康體通」預訂球場，指：「就算係執雞嘅場，冇人用嘅場我都 book 唔到。」片中顯示即使球場列出有可租用時段，他按預訂後會顯示「網上輪候中」，但最後會彈出「無法提供」。陳朗昇在影片中稱，預訂球場只打算作「私人活動」，「同一啲我認識嘅小朋友去踢波」，曾致電康體通查詢，惟「調查」至今兩個月仍未有回覆。

兩次致電查詢 職員僅表示「調查中」

陳朗昇向《獨媒》講述事情經過，他指個人一直擁有「康體通」帳號，但過去一段時間未有使用，至近期失業，望租場用作「私人活動」，不過就發現未能成功租場。他及後曾致電「康體通」查詢，當時職員指：「無理由㗎喎，除非成日 book 咗無嚟，先會黑名單。」職員表示會「調查」跟進，惟相隔約兩個月仍未有消息，遂再次致電查詢，職員再次表示：「調查緊㗎喇，調查緊㗎喇，我哋有結果覆你啦。」

陳朗昇提到，「康體通」職員從未有主動回覆「調查」進度：「真係好離譜依家香港地。你話調查其實有幾難查呀？打開個 account 望一望就見到啦！15分鐘嘅事，得就得，唔得咪失德囉。」陳認為如職員無法處理，應直接表明：「好話唔好聽，你要講，咁你咪話囉：『有啲人係處理唔到，詳情你問返康文署啦。』咁最起碼我知擺咗落黑名單。」

陳朗昇形容康文署回應「精彩」

對於康文署表示不評論個別個案，陳朗昇指回應「精彩」：「佢無否認係黑名單」、「都幾明顯㗎喇，我當咗係。」他坦言對事件感到不開心，「咁樣嘅事都會發生」，「啫係咩事啫，大家都係香港人，我宜家又唔係做乜……都估到嘅，你驚我 book 個足球場踢記協盃嘛，你咁擔心咪嚟監視住囉。」他自覺被康文署針對：「帶來生活上好大不便又不是嘅，但原則上咁樣剝奪一個人租場自由，係咪可以咁樣呀？」

版權: 禁止衍生