林峯兌現承諾交人　主題樂園親子遊變粉絲見面會

隨住《尋秦記》電影版爆紅，片中位位主角都再次翻紅，所到之處更係焦點，當中「秦王趙盤」林峯日前出席慶功宴時，就自爆情人節要「交人」，陪老婆同個女，話口未完，尋日（12日）佢就被大批網友偶遇到佢現身主題樂園，仲任影唔嬲，大方零架子。林峯一頭金髮sharp醒搶眼，難得佢見人就影，即使戴住口罩都難遮星味，見佢同唔同網友都喺同一個位合照，似乎當時搵佢集郵嘅粉絲已經排晒長龍，簡直就係迷你粉絲見面會。另外，又有網民上載林峯與同行人士餐廳用餐嘅相，見佢夾餸時笑到四萬咁口，似足古天樂曾於訪問中提到林峯食親飯都會不停大讚每一道菜「好食」，今次真係間接印證古天樂所言。

東網網站 : https://on.cc/東網Facebook專頁 : https://www.facebook.com/onccnews/