KOL雪姨又買樓! 2400呎連天台豪宅盛惠$●●萬 更邀網友浸浴：有無人不想努力了?

KOL雪姨早前憑一段鬧爆Chanel聖誕倒數日曆的短片，紅遍全香港網絡界。除了美妝，雪姨都熱衷投資，包括買樓。有傳雪姨之前斥$3,000萬買入北角寶馬山一個豪宅，連同天台面積接近2,400呎。她日前便拍片與網友一齊睇樓，並笑稱製作團隊的攝影師當然特別溫柔，可能是因為「阿姨我不想努力了」，真係太勢利。

撰文：Yin｜圖片來源：YouTube@Snow E

雪姨日前上載這段睇新樓的影片，她表示本身並無打算拍片，但因為收到多名記者查詢，決定自己拍片跟廣大網友分享，又形容這是今個年度最無悔的投資。

雪姨第一眼就被廚房的雲石island吸引

雪姨在片中沒有披露新買豪宅的位置，僅稱是北角半山 (亦即寶馬山)，據報是百福道的寶馬台。她搭Lift後要再上一段樓梯，才到達新居的大門。

一入屋，就係寬廣的開放式廚房，雪姨話新居廚房的雲石island，她第一眼睇就已經覺得好吸引。

巡視廚房後，就走到長方形的大廳，四四方方十分實用，窗外是開揚的樓景和海景。雪姨提到，大廳沒有電視機位，因為是用投映機，並在窗前拉下簾幕。

雪姨新居主人房套廁 浴缸如日式風呂

之後就係主人房，就是一張雙人床，還有套廁。當中她最鍾意的是一個又大又深的浴缸，特別適合浸浴，她笑言足夠3個男人一齊浸。而套廁的另一邊則是大型的衣帽間，可以讓她把所有靚手袋都Display出來。

攝影師突然溫柔「求包養」 雪姨：太勢利

睇到這裡，雪姨話攝影師突然變得好溫柔。字幕則搞笑地顯示「求包養」、「阿姨我不想努力了」。雪姨就話：「真係太勢利喇。」

接下來，就係睇豪宅另一端的客房客廁，還有休閒房。雪姨打算在休閒房加裝隔音，好讓她可以Chill下、飲下酒。

千呎天台將劃3區域 方便宴客

不過，就算她都喜歡豪宅內的部分位置，但仍然打算全部砍掉重練，雪姨又話上一手業主裝修用了大約$200萬，相信如今材料人工更貴，裝修費將會更高。

雪姨帶大家睇完1,400呎豪宅，最後來到1,000呎的天台，可以直接欣賞風景之餘，她打算把天台劃成3個區域，包括Jacuzzi日式露天風呂、戶外影院和BBQ場。