唔小心整污糟咗件衫？唔同污漬有唔同去漬方法

相信每個人都有唔小心整污糟衫嘅經歷，除咗食物污漬，都可能有粉底漬、筆痕或者係血，尤其女士們應該特別明白清洗血漬嘅苦。如果遇到呢啲問題都唔洗咁擔心，對付唔同污漬有唔同方法，只要用啱清潔工具組合，就可以同污漬 say bye bye 喇～

1. 食物污漬

對付食物污漬可以使用衣物漂白劑同梳打粉，首先將兩者以1:1嘅比例混合，混合後將佢搽上污漬處，再用暖水浸一晚，然後擺落洗衣機洗。如果係特別頑固嘅污漬，可以先喺污糟嘅地方搽上洗潔精等油漬被溶解，再進行啱啱提到嘅步驟。

2. 粉底

唔少女仔應該都試過唔小心印咗啲粉底落件衫度，只要用卸妝油加牙刷就可以解決呢個問題。首先喺件衫下面墊好廚房紙巾，然後喺粉底漬度落啲卸妝油，再用牙刷輕輕擦拭，啲粉底就會滲落廚房紙巾度，搞掂！

3. 原子筆

原子筆睇落好難洗乾淨，但其實只要用酒精搓手液就可以溶解到墨水，同樣用牙刷輕輕擦拭，再放件衫落洗衣機洗就得㗎喇～

4. 血漬

血漬係女仔成日都好煩惱嘅問題，尤其喺經期嘅時候會係咁留意自己身後有冇污糟到，如果真係唔好彩污糟咗都唔難解決嘅～首先！唔好用熱水洗血漬，因為熱水會令蛋白質凝固，變得更加難洗。正確嘅辦法係先喺衣物下面墊廚房紙巾，再將以1:1比例混合好嘅衣物漂白劑同洗衣粉搽上血漬處，之後就會見到該處開始起泡，然後再等個十分鐘先將衣物放落洗衣機洗。