娛圈單打︱公開關係逼認愛　通常好快變舊菜

一世人流流長，總會碰上幾個人渣。男又好，女又好，感情路上都有機會遇人不淑，癡心錯付。之不過有賭未為輸，最緊要快快收拾心情，重新上路，皆因The Best Is Yet To Come。

講咁多廢話，無非有感而發。其貌不揚嘅38歲C AllStar成員梁釗峰，最近被指一腳踏兩船，靚女化妝師女友Karen最終搬離同居愛巢，4年情斷。查實有呢個結果，外界都不感意外，皆因分手前夕，Karen忽然喺社交網上載36張密照，當中不乏跟釗峰半裸咀嘴相，令人嘩然。

呢段情密冚4年，一直相安無事，女方忽然高調發相，即係要向全世界公開關係，逼男方認愛。釗峰其後承認Karen嘅女友地位，但顯得不欲多言，亦冇轉發有關照片，似乎係「焗認」。出到呢一招，即係女方好有迫切感，覺得地位不保，關係危危乎。問題係一個人變咗心，點會因為被逼兩逼就回心轉意吖。果不其然，二人未幾即宣告分手。

諗都諗得到，如果雙方感情要好，千依百順，根本唔需要發密照表態。最近都有好多類似例子，全部沒有好下場。例如南韓已故女星金賽綸，生前忽然發出跟金秀賢嘅密照，其後水落石出，可惜已經香消玉殞。又好似K-Pop天王GD，8年緋聞女友珠妍忽然發出抱貓照，被認出係GD愛貓，結果即遭GD打臉，斷然否認大家係戀人關係，8年情玩完。

所以啫，唔係你就唔係你。講番釗峰，形象都可謂插晒水，網民紛紛留言諷刺「幾多對持續愛到幾多歲」，仲話渣男冇樣睇，勸勉Karen下次搵個靚仔拍拖啦。

東網網站 : https://on.cc/東網Facebook專頁 : https://www.facebook.com/onccnews/