Day新歌玩「中二病」　同羊咩咩拍MV勁Friend

女團COLLAR成員許軼（Day）繼早前單飛推出首支個人單曲《Wait A Second》後，昨日（14日）再推出第二首歌曲《hold on》，曲風以小清新為主，帶出「中二病」的想法。

Day指第一次聽新歌Demo時已勾起她「中二病」的想法，她表示：「呢首歌其實有好多解讀，可以話係講一首situationship嘅歌，但自己對呢首歌解讀係幾『中二病』想法，例如：兩個唔同時空嘅東西，永遠見唔到大家；又或者，一棵細嘅樹畀一棵好大嘅樹遮住，永遠見唔到日出；又或者紅燈同綠燈，永遠無法正面望住大家。」

為配合清新風格，Day特別找來張蔓姿為MV擔任導演，又專誠找來半歲大羊咩咩擔演對手戲，拍攝期間羊咩咩與Day一拍即合，令拍攝過程順利，難怪Day笑言十分榮幸。雖然埋位前，羊咩咩一度表現震騰騰，但經過一輪「相處」後，Day與羊咩咩漸漸混熟，Day指：「隻羊喺MV度係一個重要角色，同羊合作，比想像中順利好多，雖然佢要一段時間適應，但佢適應咗之後真係好乖，佢好得意，而且又好細隻。當我哋傾咗一陣偈就Friend咗，佢仲肯畀我摸，又願意同我坐得近啲。」

COLLAR團歌亦曾經跟鸚鵡合作，今次再與羊咩咩演對手戲，問到Day會否抗拒跟動物合作？她則表示：「好正呀，好有趣，今次係專登將隻羊運嚟拍攝現場，特別邀請佢嚟，好榮幸可以同羊合作。」

東網網站 : https://on.cc/東網Facebook專頁 : https://www.facebook.com/onccnews/