港男慨嘆年過45歲好難識對象 網友打臉錯重點 仲話中佬都可以「不想努力」!?

過去坊間不時討論「剩女」，形容女士到若干年齡仍然搵唔到伴侶，其實男士又何嘗唔係一樣？有港男就慨嘆，男人超過咗45歲就好難識到對象。雖然講法有網友認同，更多網友就對港男打臉，直斥他錯晒重點，睇男人根本唔係睇年齡，仲意外引出「不想努力」嘅故事。

撰文：Yin｜圖片來源：香港討論區截圖、ViuTV節目《中佬唔易做》截圖、新傳媒圖片

有港男日前喺香港討論區發帖，求教網友「男人超過45歲係咪比較難識對象」。港男話，除非有份好工做，搵到唔少錢，否則都係好困難。但佢又話，有部分女人要求好低，淨係有食有住，嫁過(編註：應該係「個」，不是「過」)男人，(就算對方)條件唔好，例如年齡大10幾年，或做份司機都可以接受。

港男40係一枝花？定係爛茶渣？

對於港男這番見解，都有部分網友不表同意，仲話「男人40一枝花，女人40變大媽」(編註：慣用俗語應為「男人三十一枝花，女人四十爛茶渣」)；但有網友亦都自言「又窮又老又冇學識」，決定「疊埋心水做萬年單身狗」。

網友斥港男錯重點：45歲係Sell錢

不過，更多網友就覺得港男嘅講法係錯重點，因為睇男人從來唔係睇年齡，而且正如上面準備做「萬年單身狗」的網友一件事提到，就係窮，先至係難識女仔的真正原因。

45+成功例子不少 先決條件係港男要有錢

網友仲向港男介紹眾多「45+」的成功例子，證明年齡從來都唔係男人識女仔嘅障礙，有錢嘅男人幾多歲都可以有大把女。

港男不妨「將貨就價」 一樣有選擇

當然，大部分網友都可能未達到上述成功男士嘅級數，但亦都唔駛咁快灰心。畢竟在男女這個「大市場」，都係講供求關係，如果達唔到高水平，或者可以降低自己嘅要求，搵返同一年齡層都係選擇。有網友就講笑話，假如45歲港男將目標對準60至80歲嘅年齡層，一定大有市場。

港男不用灰心 中佬都可以得到「不想努力」遭遇

其實做人又唔駛去到60歲以上咁極端，有網友就分享中佬都可以遇到「阿姨我不想努力了」的故事，女方仲要唔係阿姨，而係比男方年紀還要細5歲，絕對係勵志故事。雖然這個勵志故事「無圖無真相」，但其他網友估計，可能女人去到某些年紀，確實已經無太多要求；亦有人估計可能係這位中佬本身靚仔，先至吸引到「有錢阿姨」。