福正@TomFatKi發千字反駁　女友為保護成員「冇將我哋叫雞嘅事公開」

憑《天水圍Gang Gang》令不少香港人認識的TomFatKi（光頭幫，簡稱TFK），成員包括福正、肥仔和阿奇，亦有Billy Choi、李一丁、東城、何圖、Gary等合作做歌。隊員肥仔昨晚（9月4日）撰長文宣布退出TFK，並大爆「有自己人容許女朋友登入WhatsApp監控對話」，矛頭直指福正與其YouTuber女友肥蛙，又指開會期間有人錄音錄影。

肥仔出帖後，福正亦作出回應，在社交平台以千字文反駁有關指控。福正表示，最對不起是他的女朋友，因為她一直為保護福正、肥仔、奇三個，沒有將他們「叫雞」（召妓）一事公開。福正又解釋，女友從不干涉TFK任何決定，「俾佢睇到WhatsApp嘅事，源於我係佢嘅電腦無登出，導致相關嘅情況出現。」

福正帖文全文：「去到呢刻我最對唔住嘅係我女朋友，因為呢刻都係保護緊我、肥仔、奇三個，無將我地「叫雞」既事公開講出來。即使我女朋友已經原諒左我地，但依家所有網絡攻擊反而只係攻擊佢，佢咩都無做，但佢承受嘅係最多。難道我地咁大個人想屈一個女人？我女朋友從來都不干涉我係TFK上任何決定、我可以以我條命去發誓。佢亦從來不強迫我提供任何對話俾佢睇。俾佢睇到Whatsapp既事，源於我係佢既電腦無登出，導致相關既情況出現。呢個情況係怪我，唔係怪佢。肥仔，我亦有曾經同你道歉。」

「你話到錄音錄影，我會咁樣講，要講就講事實既全部。當日因為叫雞件事，我同女朋友應約返到studio 同肥仔、阿奇、東城、一丁、何圖、Billy進行談判。我哋有進行錄音，但從來無錄影。原因係因為有人係件事出現前，同我講左啲唔好好處理的話，就會威脅我既事，所以目的保障我。錄音內容將件事完整錄下，連同所有人既態度、情緒都有記錄低。如果要將所有事情放上檯面，呢個行為真係太偏激，所以過去呢半年，我不斷以不同方法，大家約出黎傾，好多篇千字文，group message，PM message，電話打比你地，所有嘢換來係 -- 「已讀不回」。（相信上個post已經提及過）接到任何既job approach，問大家做唔做 — 「已讀不回」。表達自己想TFK可以點樣點樣發展， - 「已讀不回」。」

「我感受到係拒絕溝通，受排擠，受侮辱，但唔緊要，最重要既係TFK好，因為我真係好想繼續同大家走落去。直到我上一篇聲明，大家見到我既目的都係想好好溝通，但換來既係更多既誤會。由此至終，我想改變既原因只得一個，我地呢三個由細玩到大既兄弟班好。我希望我哋有自己作品既主導權，而唔係當我哋想創作時，要被拒絕，要人批准我哋做啲咩作品。或者一個post一文一字都要人打要人批准。」

「有人覺得我因為利潤分薄，而唔想有其他人參與。No. 我尋求既是「公平」、「公道」，我要保障我們三個人既利益，我要維持TFK財政健康，營運正常，唔會大家做嘢食飯無錢，Studio唔會再無錢交租。曾經我地有多想做既事，好多宏大既夢想，我都希望最後係可持續咁運作到。而我從來都唔介意幾多個人分，因為餅係愈做愈大，最重要既係溝通同清清楚楚。」

「到了兩日前，我地三個傾談之中指出，我唔介意大家以多於3人繼續，我只想TFK好，但換嚟既係今日咁既景況。事到如今，好似已經返唔到轉頭，大家千夫所指覺得我／我女朋友令到TFK搞到今時今日咁，其實一啲都唔關我女朋友事。真正原因根本就係拒絕溝通，再次強調，我上一篇聲明都係想解決，同埋有約過你地出來傾。點解到最後唔係解決事情？係咪因為有一啲想借TFK嘅名希望得到更多利益嘅人令我地既關係咁樣？ - 福正 05.09.2023 2:08」