The Urban Tale 迪基亞的都市傳說

日前迪基亞確定離隊，引致網上一片責難曼聯會方的聲音，大多為批評球會對待老臣子手法不體面，主帥無情一而再將傳奇掃地出門。在沉澱兩天後，唔知大家有無其他諗法浮現呢？版主在網上看的一篇文章由另一個角度去看待迪基亞離隊一事，以下會和大家分享：

轉載文章：迪基亞的都市傳說

作者：@footanalysthk

隨住de Gea正式離隊，圍繞佢嘅鬧劇終於可以告一段落。所指嘅鬧劇並非球會同佢嘅續約事宜，而係香港媒體多年黎利用佢作為流量密碼煽風點火嘅亂局（對阿仙奴被Fred輕微踩到棄關碌地就係最佳例子，當時外媒紛紛指摘de Gea係懦夫，唯獨港媒將矛頭指向Fred）。如今輿論再次一面倒支持de Gea（亦係香港獨有），可謂意料中事，但當中又有幾多論點係真實成立？

1. 要不是de Gea？

講到de Gea，唔少球迷就會即時聯想到佢啲所謂神救，「要不是de Gea，曼聯早就失去前四／淪陷／降班」，事實真係如此嗎？自17/18英超有紀錄以黎，de Gea喺六個球季當中只有兩季喺PSxG +/-錄得正數，換句話說即係有四季嘅失球都比預期多，亦冇得賴後防問題。就算唔計高空波、單刀出迎、用波差呢啲弱點，單計佢最擅長嘅shot-stopping，極其量都只係一個average、easily replaceable嘅門將。

18/19球季，曼聯主場迎戰阿仙奴，de Gea排球二傳式將Mustafi嘅頭鎚托入龍門，最終以2:2完場；次循環賽事，Xhaka離門三十碼起腳，de Gea移步錯誤讓皮球溜入全失三分；去到季尾最後直路主場鬥曼城，被Silva同Sane先後中距離射入近柱地波再次全失三分；翌仗主場對車路士，de Gea將Rudiger三十多碼嘅正中遠射撲到門前讓Alonso補中，由三分變一分，而球隊最終亦以五分之差失落前四。喺歐聯八強，de Gea讓Messi禁區外軟弱無力嘅右腳射門喺腋下漏入，直接殺死比賽。

綜合以上兩點，更值得提出嘅問題係：要不是de Gea，曼聯18/19或許可以打入前四？要不是de Gea，曼聯今季喺歐霸盃同足總盃或許可以有更大成就？小編不置可否，但呢啲都係球迷需要考慮嘅possibilities，而非盲目相信要不是de Gea曼聯早就完蛋。所謂神救唔係de Gea嘅專利，出面大把龍門都week in week out做緊，就算沒有de Gea曼聯亦不見得要空門出賽，何必執迷於「要不是de Gea」身上呢？

2. 忠誠何價？

據小編嘅認知，忠誠喺足球係指球員受更好條件、更好球會邀請都不為所動，de Gea又係唔係呢？2015年夏天，de Gea整個轉會窗都同皇馬眉來眼去，van Gaal甚至已經打定輸數，簽入Romero作為替補，並喺開季頭四場英超雪藏de Gea，逼使佢盡快作出決定。雖然轉會最後喺無限接近下告吹，發生左著名嘅fax機事件，但de Gea當時有離心卻係公開嘅秘密。當然de Gea最後留隊效力十二載，無疑係一個long servant、club legend，但係咪loyal？值得大家深思。

至於何價，相信de Gea嘅合約已經係一個明確答案。假若大家對全球最高薪嘅龍門——375k週薪冇咩概念，或者可以參考下其他頂級門將嘅薪酬：為皇馬多番作出神救繼而贏得歐聯嘅Courtois——250k；過去五季有四季都喺PSxG +/-錄得正數嘅Alisson——150k；今季喺西甲有26場不失球、奪得金手套嘅ter Stegen——150k；為曼城贏得三冠王嘅Ederson——100k。雖然曼聯以溢價買賣絕非新鮮事，但開比de Gea嘅375k，特別仲要喺2019年佢屢次犯錯下開出呢份合約，還不足以報答佢嘅忠誠？而de Gea當時選擇續約，到底係純粹因為忠誠，還是呢個offer好到不能拒絕呢？

3. 彈弓手唔尊重？

首先，關於呢次續約風波好多細節、內幕、時間線都係不詳，外媒都係當趣聞一則一笑置之，唯獨香港媒體、球迷窮追猛打。以de Gea季尾catastrophic嘅演出，球會唔同佢續約、收回offer係合理不過嘅舉動，惟曼迷對佢有情意結、非曼迷巴不得佢留隊繼續拖曼聯後腿，先會吹出曼聯有欠於de Gea嘅風向。到底所謂嘅減薪協議係幾時提出？用咩形式提出？今次係咪de Gea或其經理人單方面放風爆料？Who cares.

為營造曼聯虧待de Gea嘅輿論，又有人稱至少應該比佢喺主場告別以示尊重，有用嗎？去季曼聯就比Mata喺主場告別，同樣被批評對老臣子無情無義、用完即棄，球迷甚至話佢轉投死敵列斯聯都冇問題。結果Mata遠走土超加拉塔沙雷都踢唔掂，一季後又被放棄，而家又回復自由身。喺足球世界，球員來來去去、老將過左巔峰被取代乃平常不過之事，好多時都係一句thank you and goodbye就算，唯獨係曼聯又要講情又要講義，成日要念在唔知幾多季前嘅功勞而被抽水，正如當年後防三老過晒氣、跌晒watt球迷都話要留。

唔知大家沉澱兩日後，再睇埋呢篇文章，由另一個角度去諗件事會唔會有其他見解呢？

▼Follow Royce Sports 曼聯費格遜

Instagram: https://www.instagram.com/roycesports/