黃日華懶理被指失業：係應該退落嚟㗎啦！

入行超過50年的賈思樂（Louie）今年情人節將會再舉行《Happy Together Again 2026 in Concert》演唱會，日前偕黃日華接受電視台訪問，二人曾合演舞台劇，問到可會邀黃日華合唱？Louie笑言請不起：「要華哥開金口好貴㗎！不過我哋係講心唔講金！佢不嬲都係一個好有義氣嘅人，從來都唔會托手踭！」黃日華表示只要Louie開到口就一定幫手，他說：「當年太太講過佢係個好有義氣嘅人，無論咩嘢，只要佢出聲，就一定要幫忙。」

講到Louie的演唱會將會在浪漫情人節翌日舉行，黃日華就表示自己並非浪漫之人：「當年我老婆成日都投訴我唔夠浪漫，嚟嚟去去都係嗰幾招，都係送99朵玫瑰之類，佢收到就會好開心，同埋我冇咁多時間去構思乜嘢驚喜嘅Party呀！Louie就浪漫好多喇！」Louie接着說認同：「我唔可以用勁嚟形容，我係好浪漫，不過出到嚟嘅效果就好唔浪漫，係烏龍囉！我曾經喺情人節，約狄寶娜摩亞去五星級酒店食燭光晚餐，點知就將成半支茄汁，唧落佢嘅高踭鞋嗰度，愈抹就愈核突，尷尬到死囉！」

對於近期有指黃日華失業，他表示已經百毒不侵：「我完全唔介意囉！都去到爐火純青嘅階段，都辛苦咗幾十年囉，係應該退落嚟㗎啦，做番自己鍾意做嘅嘢，前半生我都稍為有啲成績，貢獻畀各大觀眾，後半生嘅時間就留番畀自己啦！你好難去確定每個人都會鍾意你，依家網上面嘅言論更加離譜，大家講嘢毋須負責任嘅，所以唔需要太過介懷，太過理會佢哋講乜嘢，最緊要做好自己！」Louie亦深表認同。

東網網站 : https://on.cc/東網Facebook專頁 : https://www.facebook.com/onccnews/