李施嬅40歲生日快樂！一文重溫入行18年來進化變臉歷程

2月12日是李施嬅（前名李詩韻）生日！自03年參加港姐入行，以爆冷姿態奪得「最上鏡小姐」及「才藝小姐」獎項，不過最後三甲不入，成為首位五甲不入的最上鏡小姐。加入無綫拍劇多年，李施嬅一直做大配角，14 年她不但改名轉運，五官輪廓亦開始銳變，被指由選港姐時的扁鼻樑，變成筆直的旺夫闊太鼻。當年的最上鏡小姐李施嬅為了 keep住上鏡，面容變化甚大，相比起初出道時的樣子，現在五官變得極度緊緻與立體，與無綫已冇合約關係的她曾在《萬千星輝頒獎典禮2019》憑《金宵大廈》獲得「最受歡迎電視女角色」，當晚興奮上台攞獎，面部肌肉繃緊，笑容硬晒軚，近睇仲甩晒粉，真係老貓燒鬚。

撰文、圖片：東方新地

李施嬅03年鼻大細眼 19年鼻高眼大

翻看03年李施嬅（以前叫李詩韻）參加港姐時的照片，當時鼻大而鼻樑扁，單眼皮細眼，外表雖然唔突出，更被指有點似初出道的彭羚，但她仍爆冷奪得「最上鏡小 姐」及「才藝小姐」，之後簽無綫拍過多部劇集，不過都係演大配角發展平平。由10年開始，李施嬅突然女大十八變，鼻樑變高又挺，鼻翼收細但鼻頭仍然有肉， 眼皮由單變雙， 斗零眼都變五蚊銀，面容之變真神奇。到去年李施嬅被安排在「第46屆香港小姐」選舉決賽中擔任評判，同新一屆佳麗同場出鏡鬥靚，40歲的她卻能逆齡生長， 零皺紋、肌膚繃緊眼肚消失愈變愈靚， 與十六年前選港姐時相比，五官輪廓已大躍進。

40歲零表情紋變索令事業有起色

扮靚呢家嘢真係會上癮，但過度過量亦會有反效果，李施嬅變索令事業亦有起色，17年她憑微電影《 Once More》獲得European Cinematography Awards和Los Angeles Film Awards的最佳女主角，成為雙料歐美影后，去年《金宵大廈》一劇更令她的演技被香港觀眾認同，雖然視后輸畀得高望重的惠英紅，但她獲得「最受歡迎電視女角色」，總算在離開娘家無綫後都拎個安慰獎。在頒獎禮當晚，李施嬅的容貌再成為熱話，知情者透露：「Selena（李施嬅）喺頒獎禮嗰晚個樣唔同咗，怪怪哋，表情繃緊，仲一啲表情紋都冇，不過每 次有人問佢，佢都話係化妝同美容嘅功勞！」女為悅己者容係啱，不過都要適可而止。