敖嘉年拍節目遇高山症　埋頭籌備懸疑劇本

藝人敖嘉年、江嘉敏、陳婉衡及簡淑兒等昨晚（26日）出席HOY TV節目《橫素全中國》首播宴，身兼節目主持兼策劃的敖嘉年茹素超過十年，透露今次走訪了雲南、青海、陜西及香港等多個地方，介紹當地的素食文化和食材。節目更花了7位數、2個多月的拍攝日去拍攝，除了到貢山採摘巨型的野生黑松露外，亦到了雲南石屏了解豆腐製作過程，他説：「最難忘係去青海，因當嗰度高海拔3千8百米所以有高山症，夜晚瞓到4點幾呼吸唔順扎醒。」他期望節目能開第2季和第3季，因內地仍有很多地方未拍。

敖嘉年透露現時正忙於籌備劇集寫劇本，完成後會交由HOY TV和馬來西亞電視台拍攝，他笑謂：「因為自己係幕後出身所以身痕，一有機會就會寫劇本，哈哈！自己鍾意恐怖懸疑嘅故事，同歐焯文寫好劇本，交咗畀馬來西亞嗰邊睇。（會搵李佳芯做女主角？）到時諗下都好。（有冇心儀人選？）搞好晒個劇本先，之後先再砌，我本身個人唔停得落嚟，趁仲有小小力氣繼續做。」

明顯瘦了不少的江嘉敏，表示因早前食物中毒致屙嘔後瘦了，笑指每次也是跟別人一起吃飯，但卻得自己出事：「已經唔係第一次遇到咁嘅情況，今次係10年入面最嚴重嘅一次，之前可能屙為主，但今次淨係嘔黃膽水已經嘔滿咗兩個垃圾桶，嘔完嗰日瘦咗4公斤，但我依家食返晒，哈哈！（減肥大計完成？）減肥係終身事業，所以會一直做運動同食得清淡啲。」她表示指稍後將會去做詳細身體檢查，但因過程需時要住院幾天，加上事後要休息，故先要夾好空檔才能去做。

江嘉敏透露現正為節目《安居樂業》拍攝第四輯，提到她在第一輯時已揚言要買樓，她笑言仍未買到樓，會繼續努力搵錢：「越睇得多樓個人越貪心，依家節目啲樓越睇越貴。（搵個男友一齊努力？）有冇好介紹？（空虛咗好耐？）又唔係，我仲有好多工作同朋友。」問到新一年願望是否再脫單？她笑問：「點解係再？（你想話自己A0？）我今日係！哈哈！依家30歲趁後生都係工作為先，否則到第100輯都未買到樓。」

至於將於3月結婚的陳婉衡，表示婚禮籌備得七七八八，透露婚禮會在外地一個陽光與海灘的地方舉行，問到時是否會大騷身材？她笑稱大家到時看照片便會知道：「比比堅尼多布，哈哈！（有冇瘋狂減肥？）又冇減得好犀利，我係拉長咗個時間去慢慢減，因為驚依家呢個年紀減得太犀利個樣會好殘，所以唔係好敢地獄式減肥。」她表示不急於造人，婚後想先享受1、2年的二人世界，又指已找來簡淑兒做伴娘，笑言未找到新郎前已找了她當伴娘。

簡淑儀則表示屆時趁熱鬧會搶花球，問到老公麥大力會否一起出席婚禮？她笑謂：「會呀，老公係自己邀請自己去。（怕你到時太性感惹狂蜂浪蝶？）佢見識咗我哋嘅婚禮啲人有幾癲之後就好擔心，跟住佢就邀請咗自己。」陳婉衡則大爆自己已要求姊妹裙不要太多布，簡淑兒亦笑指這樣會比較漂亮：「個叉開高少少就好睇。」

東網網站 : https://on.cc/東網Facebook專頁 : https://www.facebook.com/onccnews/