George 再推個人單曲《出甚麼風頭》　淡然傷感嘅抒情作

《出甚麼風頭》George 歐鎮灝

事隔差唔多兩年，George終於再推出個人單曲《出甚麼風頭》，搵嚟周柏豪、陳詠謙加周錫漢依個經典班底，炮製出一首淡然傷感嘅抒情作。

「誰長眠於天空裡或最恬靜的星海垂頭沒法看淚水要襲來」

夜闌人靜，情緒總會毫無預兆地湧上，正想抒發時，頓然發現身邊無人可以分享日常嘅喜與悲，原來自己係如此孤單。

「為着自己出風頭找一堆藉口可惜結果甚麼都沒有」

回望過去，年輕時我地總會想盡辦法出風頭，可能為一時嘅快感，可能為別人嘅認同，甚至只係為所謂嘅面子，好似咁樣先叫無負青春。明知會傷害身邊人，亦以不同藉口合理化各樣行為，令自己無咁內疚，繼續搏取世界嘅掌聲。正因為太自我，結果同親友漸行漸遠，錯過彼此珍貴嘅時光，走著走著，身邊就只剩下自己。

「燃燒殆盡夢一場怕最後無法接受歲月漸無多這迷茫人生該怎麼自救」

隨年歲漸長，你慢慢會發現人生最重要嘅並唔係名成利就，更唔係所謂外界嘅肯定，反而係親人一句簡單窩心嘅讚賞，一個大家相聚嘅時刻。縱然曾經造成嘅傷害已無法改變，但依然可以嘗試彌補。把握有限嘅時間，勇敢踏出第一步，向身邊人釋出真誠嘅善意，或者你能夠找回自己嘅人生。

「浪費了的光陰賜我力量請鞭策我迎頭趕上期待最令我自責那位遠遠一聲讚賞」

《出甚麼風頭》依個曲詞組合，相信係我同唔少人嘅青春回憶，佢地合作嘅情歌係有種吸引力，到今日我仲經常重溫。今次由新一代歌手唱出另一種感覺，聽完係有份時日如飛嘅感觸。

「望着這淡黃明信片不怕醜也不怕苦的青年如今怎會自怨自憐」

最後，講下George，佢由初出道比人感覺只係靠外型，及後一步步用作品證明自己。《那年盛夏》同《翻盤下半場》兩套劇擔正都演得出色，《不赦之罪》仲入埋評論學會最佳男演員第三輪投票，絕對係對佢好大嘅肯定。

可惜George近年嘅遭遇有啲唔好彩，《不赦之罪》被金像獎DQ，令佢錯失拎最佳新演員嘅機會。P1X3L又因為唱片公司而浮浮沉沉，連歌都無咩點出，現場表演嘅機會亦欠奉。今年再次出單曲算係一個新開始，希望佢同P1X3L未來有多啲機會，我相信有能力嘅人終會發光發亮！

「如長夜實在太暗投靠面前白晝其餘未做的事盼有日子補救」

《出甚麼風頭》George 歐鎮灝
曲：周柏豪
詞：陳詠謙
編：Dick Wong
監：周錫漢、周柏豪

「望着這淡黃明信片
不怕醜也不怕苦的青年
如今怎會自怨自憐

為着自己出風頭找一堆藉口
可惜結果甚麼都沒有
燃燒殆盡夢一場怕最後無法接受
恨歲月漸無多這迷茫人生的交叉路口
如長夜實在太暗投靠面前白晝
其餘未做的事盼有日子補救」

娛樂