東方日報C2：黃宗澤全奶宴慶功　佘詩曼唔領情：即係唔預我！

黃宗澤（Bosco）與佘詩曼（阿佘）前晚齊膺雙料視帝視后，劇中飲奶成為經典場面的Bosco揚言要大搞牛奶宴慰勞台前幕後；兩度憑《新聞女王》封后的阿佘不急於開拍第3輯，擔心拍到爛令大家回憶破滅。

《萬千星輝頒獎典禮2025》前晚圓滿結束，賽果塵埃落定，黃宗澤與佘詩曼雙雙憑《新聞女王2》登「最佳男、女主角」及「大灣區最喜愛TVB男、女主角」，阿佘更破紀錄4度封后，確實威到盡。

首膺無綫視帝的Bosco表示奪得「大灣區最喜愛TVB男主角」後對視帝獎打定輸數，但見到好友苗僑偉擔任頒獎嘉賓又重燃希望，直言想不到宣布獲獎一刻自己會爆喊：「我對攞獎好佛系，但情緒嘅嘢好難控制，所以上台忍唔住爆喊，況且台下有好多睇住我大嘅前輩，又播咗雪妮同唐佳生前嘅片段，感覺被打咗兩拳，當時已經喊咗一大餐。」他笑言以往演忠角從未得獎，反而今次演奸角就「一擊即中」，看來要好好研究是否繼續走壞人路線。問到會如何慶祝？他打算相約一班朋友、邵氏同事及《新聞2》台前幕後食飯，搞笑表示：「大家整番個牛奶宴，淨係飲奶，冇飯食，簡簡單單咁慶祝啦！」

琢磨《新聞3》劇本 最驚拍到爛

至於阿佘賽後受訪時形容感覺似發夢，多謝粉絲的支持及自己多年的努力，問到如何獎勵自己？她指獎項已是最好的獎勵，對於Bosco打算辦「全奶宴」慶功，她笑說：「我都唔飲奶嘅，即係唔預我啦！同佢未好番，我唔鍾意Kingston（Bosco《新聞2》角色）㗎！其實好戥佢開心，佢努力咗好多年，演員遇到合適嘅角色，天時、地利、人和係好難得。（你帶旺佢？）唔好咁講，係佢自己努力，其實我同佢唔係好多對手戲，係佢自己叻。」問到是否會開拍《新聞3》？她認為最重要是劇本：「大家覺得要雕琢吓劇本先，睇吓諗唔諗到新嘅方向，唔係為開而開，唔急嘅，要小心處理，唔好拍到爛，希望保留美好回憶。當然打破梗係好事，但唔係咁容易，編劇要諗新橋，真係需要時間。」提到曾志偉，她自言兩、三天前已得悉其意向：「其實係好辛苦，佢之前身體唔舒服，我哋心痛，但都係佢自己嘅決定。（有冇興趣做行政工作？）冇，人哋講多兩講我就乜都好，咁唔掂，我唔係高層嘅材料。」

李施嬅龔慈恩上台「攞尾彩」

對於今次賽果，網上各有意見，不少人戥《巨塔之后》的宣萱、《新聞2》的李施嬅、龔慈恩及《金式森林》的羅子溢不值，特別是羅子溢及李施嬅，演技出色卻從未拿過視帝視后。另有不少網民讚監製鍾澍佳在《新聞2》奪得「最佳劇集」時，刻意讓李施嬅及失落女配角的龔慈恩發言，做法窩心。此外，無綫昨日公布收視，頒獎禮跨平台直播收視最高26.4點，約有170萬觀眾捧場，成為上周收視之冠。

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/