世冠盃四強：PSG贈皇馬四蛋入決賽　麥巴比對舊東家黯然失色

PSG巴黎聖日耳門喺昨晚深夜同皇家馬德里嘅世冠盃四強戰中，以4–0大炒對手，成功殺入決賽，場面一度令皇馬嘅防線崩潰。

全場開波僅6分鐘，法比安魯伊斯喺禁區外一記大力抽射入網，幫助PSG先開紀錄；3分鐘後，丹比利於皇馬後場成功於腳下偷走皮球並單刀射破古爾圖斯十指關，短短9分鐘就已經2–0領先，直接壓住對手節奏。到第24分鐘，法比安魯伊斯再度於禁區邊緣起腳得手，半場就鎖定3–0優勢。

下半場PSG並冇收手，換入岡些路拉莫斯，佢喺第87分鐘接應傳送，一記怒射破網，將比分定格4–0。整場波，PSG展現出極致嘅高位壓迫，幾乎冇俾皇馬同舊將麥巴比有任何反擊空間，壓制到呢支銀河艦隊全場僅兩次射中目標。

呢場勝利唔單止彰顯PSG嘅霸氣，亦證明佢哋嘅實力已經係歐洲頂級，有能力完勝其他歐洲豪門。下一場嘅決賽佢哋將對壘車路士，大有機會完成歐聯、法甲、法國盃同法國超級盃同世冠盃五冠夢！

港新聞Instagram：https://www.instagram.com/kong.news/
港新聞Threads : https://www.threads.net/@kong.news