超爆餡飯卷　辣炒芝士拉麵年糕｜MW Korea House｜深水埗

家庭料理簡稱住家飯，咁其實雙餸飯都係家庭料理，但我覺得真正嘅家庭料理，係要實踐到大廚家鄉同屋企嘅配方，手工自家製心機嘢，最好仲比到我呢啲野孩子感受家庭溫暖，今次呢間就做到。

呢間韓國太太主理嘅小店一向出名，比唔比到大家心靈慰藉就唔知，但嘢食都係自己手工嘢，連醬料同泡菜都寫明自家製，跟足家鄉配方，係出邊搵唔到嘅味道。難怪鋪仔簡簡單單，但都長期爆場超受歡迎。

-
🌯韓式紫菜飯卷 -五花腩 ($58)
🥓魚糕湯 ($78)
前者自家製飯卷，薄薄一層飯粒，然後填滿超誇張爆餡，比例啱啱好。而後者韓國街頭常見嘅魚糕湯，三串超大串，連埋大蔥熬起，滲滿魚糕鮮味。

🍜拉麵辣炒年糕 ($78；追加雙重芝士)
一望見咁紅，以為會好濃味又易膩，但醬汁竟然調較得啱啱好，鹹同辣中又帶微甜，拉麵年糕炒埋一齊，索哂醬汁，再鋪滿芝士真係邪惡。

🍘迷你泡菜煎餅 ($98)
呢到係連泡菜都係自家製，唔係本身埋枱免費果款泡菜，而係另一種鹹身帶辣，而煎餅都係自己搓起，薄身煎到香脆，成塊煎餅非常惹味香口。

🥘辣豆腐海鮮湯配飯 ($88)
呢到嘅湯鍋其實真係做得唔錯，寫明無味精，真足料熬起，落滿唔少洋蔥同蔬菜，熬到湯底帶甜，即使係辣湯，飲落都非常舒服，撈飯/湯飯就更正。

-
MW Korea House
🗺️深水埗福華街178A號地舖
📞5714 6478

▼Follow foodiegogoooo
Instagram: https://www.instagram.com/foodiegogoooo/