陳家豪姚潔貞再度出戰黃金海岸馬拉松 | Polar Grit X2 全力支援
每年7月舉行的澳洲黃金海岸馬拉松，以平坦賽道見稱，吸引世界各地跑手飛到南半球參賽。這項賽事，對香港長跑代表姚潔貞與陳家豪而言，可說既熟悉又有挑戰。今年，二人將攜手再次參賽。
家豪今次是第五次出戰黃金海岸，無論10公里、半馬和全馬都跑過，所以對賽道與當地環境非常熟悉，甚至有少少「返鄉下」感覺。他表示黃金海岸賽道平坦，整體氣氛輕鬆有利發揮。相比之下，潔貞今次則是第二次參賽，她回憶首次參賽時的天氣反覆無常，到埗後刮風又落雨，本來以為要「打水戰」，到起步後又出太陽，最後竟然有點「曬」，所以也要做足兩手準備。
積極備戰
今年4月，家豪與潔貞參加了德國漢堡馬拉松，但分別在腳傷初癒以及準備不足之下，成績未算十分理想 (潔貞: 2:48’39, 家豪: 2:36’33)。潔貞:「上次因為腳傷，加上賽前俾阿囡傳染搞到病咗，唔算跑得好好，希望今次會跑得好啲。」家豪:「其實我上次係3月尾先確認參賽，所以基本上無乜準備，最後跑到2小時36分，已算勉強達標。我對上一次喺2019年參加黃金海岸馬拉松，當時跑到2小時32分，今次目標跑到2小時30 PB! 喺漢堡無乜練都跑到呢個時間，有機會嘅!」
備戰而言，家豪就分享了他們的分階段練習方法:
由慢跑建立里數、體能等基礎
逐步增加強度及速度
進行專項練習，提升表現
因為潔貞之前有傷，家豪認為在避免傷患的大前題下，潔貞跑夠里數去到第二階段就已經「夠做」，目標2小時40分完成。
平衡家庭
作為兩女之父，家豪與潔貞的訓練日程，亦要平衡家庭生活。他們笑言，疫情期間未有外傭姐姐幫手，加上要照顧停課的女兒，二人只能「先後腳」輪流出去跑步，深夜還要處理家務，是體力與意志一大考驗。現在隨著大女兒上了小學，家豪時間變得更有彈性，反而潔貞要主力照顧細女，所以就係工作、家庭和練習時間真的要好好分配。
家豪:「其實心態都有轉變，以前覺得運動員生涯短暫，成日想衝衝衝，但原來身體都未咁快回復到，咁就要換個模式。」潔貞: 「以前港隊日本教練成日都話，如果打直行唔得，咁就繞個圈，試下另一類方法，總之達到目標，都係好事。」
出戰黃金海岸心得
對於同樣會前往參賽的香港跑手，家豪亦分享了幾點心得。他首先提到天氣因素:「如果真係有大風，我諗大家可以互相破風。如果逆風，你自己一個人食晒啲風，頂咗10K、20K，你會捱唔住。」在飲食方面，他就指當地不乏中、日、韓餐廳，跑手不用擔心找不到合適的賽前補給。若想更穩妥，亦可自備即食飯或乾糧。
路線方面，家豪建議跑手先到官網了解，並在賽前慢跑視察，但整體而言賽道較為平坦，斜路不多。最後，他語重心長地提醒大家：「最重要係，唔好盲目去衝，你練習時練到幾多就有幾多，無得勉強。」潔貞亦強調，跑手必須按自己的心率和身體感覺去跑，切忌被現場氣氛帶亂節奏。
[View this post on Instagram
](https://www.instagram.com/reel/DK9VjtKSAuf/?utm_source=ig_embed&utm_campaign=loading)
Polar Grit X2 科技助力
作為 Polar 長期用家，家豪與潔貞在今次黃金海岸馬拉松，將會配備全新 Polar Grit X2 出戰。對於 Grit X2 藍寶石玻璃錶面與輕量設計，二人均表示讚賞。
家豪:「你知啦，潔貞比較粗心大意，經常會跌嘢撞嘢，今次有呢個錶面就啱晒，唔使驚刮花!」潔貞:「我比賽時會睇住心率，當心跳去到 Zone 5 時，就知道要減速。Grit X2 有1.28 吋全彩 AMOLED 螢幕，猛太陽之下都睇得好清楚。」
問他們最喜愛的 Polar 手錶功能，潔貞就表示好之前經常使用睡眠追蹤功能:「我鍾意睇睡眠分析，佢會話畀你知深層同淺層睡眠比例，仲有你瞓咗幾多個鐘，對第二日嘅訓練狀態有咩影響。」透過這些數據，潔貞表示可以更好地調整作息與訓練計劃，確保身體在最佳狀態下應對高強度訓練。
至於家豪，他就表示 Polar 手錶的 Training View 非常有用: 「我會根據不同的訓練模式切換界面，例如運動場衝圈時只顯示時間和圈速，貪字大少少更易睇；長課時我就會加入心率和總距離其他數據，要轉換都非常方便。
Polar Grit X2
Grit X2 採用與 Grit X2 Pro 相同作業系統，支援未來 Polar 軟體更新與新功能。所有訓練與健康數據皆整合於 Polar Flow 生態系統，透過手機應用程式與雲端平台，實現跨裝置同步、深入分析與個人化設定。
即日起於 Polar.com 及指定零售點有售。
配色：夜黑色、啡銅色
建議零售價：港幣 3,990
The post 陳家豪姚潔貞再度出戰黃金海岸馬拉松 | Polar Grit X2 全力支援 appeared first on Fitz 運動平台.