網上熱話｜黃大仙藥房結業貼「五雷轟頂」大字報 播慘情音樂哭喊「執笠呀」
本地零售業結業潮不止。最近，黃大仙一間藥房宣布即將執笠，正全場清貨，惟其宣告結業方式別樹一格，在門外貼滿多幅大字報如「滴血之痛」、「五雷轟頂」、「六月飛霜」等，更有揚聲器播放慘情音樂及有男聲哭腔稱「好慘，執笠呀」，網民稱：「唔知個老細係咪讀Drama，執笠都可以執到咁戲劇化」。
有網民周三(13日)在社交平台Threads發文，指日前途經黃大仙新光中心附近一間藥房，發現其門外張貼多張大字報，宣布因「不敵熊市」倒閉，現正全場清貨大減價，市面上定價過千元的安宮牛黃丸更有買一送二、買二送五優惠，揚言是「蝕本出售」、「一件不留」。
安宮牛黃丸買一送二
除此之外，大字報更寫上「五雷轟頂」、「六月飛霜」、「救命」、「慘」、「滴血之痛」、「人間無情」等字眼，店外更透過揚聲器播放疑為老闆以悲壯哭腔聲線宣讀的「執笠」廣播，直指「好慘，結束營業，安宮牛黃丸買一送二，係呀，安宮牛黃丸買一送二呀，買二送五」，最後更呼喊「執笠呀，執笠呀」，更伴有慘情音樂。
發帖樓主不禁笑言：「唔知個老細係咪讀Drama，執笠都可以執到咁戲劇化，仲要最後加埋個咁悲慘既配樂，有無好心人去幫襯下佢啲安宮牛黃丸」。及後有大量網民查詢位置，樓主稱「間舖係黃大仙新光中心隔離，睇下有無人可憐下老細幫佢買下野」，「個位又真係偏僻啲，一般無事唔會行去個度」。
奇怪告示「人卜一竹弓空白鍵五」 網民成功解謎
帖文一出隨即引來大批網民討論，有網民表示「其實佢咁做都幾cute，慘到咁真係幾可憐」、「有埋悲壯BGM（背景音樂）收尾好有畫面」、「附近街坊幫襯吓， 蝕大本係好慘」、「裝置藝術專業，賣藥太浪費人才」、「音樂著左魔咁好入腦，以後啲舖頭 執笠用呢招一流」，亦有人留意到其中一張告示寫着「人卜一竹弓空白鍵五」，令人不明所以。有網民「解謎」認為是速成打字，即是「人卜」第1個字和「竹弓」空白鍵後第5個字，即是粗口「X街」。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)