視帝視后久違合體 互贈高帽 陳豪佘詩曼盼再合作拍劇

佘詩曼、陳豪今天（23日）出席活動，兩人皆是廣告商寵兒，受訪時互笠高帽，阿佘於社交平台廣告銷售額吸金排行榜，躍升到第五位，她謙稱：「咁叻？好開心粉絲支持，亦好多謝品牌支持，加油加油，但邊度夠陳豪多呀？當然佢勁啲，我𠵱家仲學緊嘢。」陳豪自認small potato：「阿佘帶動經濟，刺激經濟擔當嘅角色。」他指今個月是廣告期，行程安排得頗滿，下月他會放暑假，一家五口返加拿大探親，不用再辛苦太太陳茵媺一拖三搭飛機，他笑道：「之前我只負責接機送機，今次太太話趁我喺度，可以帶小朋友去遠少少地方玩。」

阿佘及陳豪上次合作拍劇，已經數到2012無綫劇《4 In Love》，2人異口同聲希望有好劇本及適合角色，再有機會合作，問陳豪是否想和阿佘再演情侶？他說：「阿佘實在keep得太好，當然希望，我哋想演一啲有質素嘅戲，令觀眾回味番之前CP感覺。」

阿佘忙為新劇《新聞女王2》開工，拍攝得如火如荼，預計要拍多1個月，問上一輯受歡迎，再演Man姐一角會否增添壓力？她說：「壓力位喺編劇，故事好緊要，我都係跟故事演活角色，希望呢一輯觀眾都會覺得幾好。」

她透露已和新加入的黃宗澤演對手戲：「佢把口衰到呢！嘴gel gel，見面就冇句好，唇槍舌劍，見親都想揼佢，係講佢喺戲入面角色，真人就好好，仲煲湯請演員飲。」她指見到高海寧連拍兩套劇，缺乏休息而濕疹入眼，也替對方慘：「我亦連住拍攝《正義女神》及《新聞女王2》，兩套劇都很多對白要記，拍完要放假畀個腦休息，我會好好保養。」

（即時娛樂）