張天賦推出全新個人大碟 以咕嚕肉比喻專輯概念

張天賦（MC）明天（17日）推出全新個人大碟《Sweet & Sour》，收錄多首大熱歌包括《小心碰頭》、《說謊者》《懷疑人生》等，還有國語新歌《目擊者》、《狼狽》及首次推出英文新歌《Ain't No Foo》及《I'm okay》。

MC認為音樂無分高低，他從不抗拒任何類型的音樂，希望透過他的每首作品，分享更多不同的音樂類型與風格，以音樂大同的態度，唱出雅俗共賞的歌。一向為食的他更以「咕嚕肉」比喻新碟的主題概念：「《Sweet & Sour》呢個名同埋概念係源自於我同同事嘅對話，當時佢叫我用一個字或詞語形容過去一年嘅生活，我話『悲喜參半』，佢就靈機一觸就話不如呢隻專輯叫《Sweet & Sour》，所以專輯概念係同情感生活中嘅對比有關，例如甜蜜同苦澀、快樂同悲傷。講起『Sweet & Sour』，喜歡食嘢嘅我一定諗起咕嚕肉。咕嚕肉有中、西式做法，老少咸宜，亦非常代表到香港。無論係高級宴會定係住家飯，都好容易會見到呢款菜式，所以我覺得咕嚕肉非常切合呢張專輯嘅概念！」

MC很開心可以推出專輯，稱一定要多謝樂迷支持。他表示︰「專輯背後有好多人一齊努力。推出專輯後，我仲有一個華納家族澳門演唱會，所以要小休一陣至繼續努力創作。如果下一張唱片可以以黑膠或卡式帶形式推出，我諗應該幾正，希望可以加入多啲元素，或者唔同語言歌曲、同不同音樂人合作。 」MC的新歌《東邪》同步於各大音樂串流平台上架，他表示這歌是全碟中最有意思的一首歌︰「《東邪》應該係《Sweet & Sour》專輯入面最有意思嘅其中一首歌，大家憑歌名都應該估到係講緊金庸小說入面嘅黃藥師，佢好獨立、好不羈、充滿反叛同神秘，呢首歌以中國風去講佢對愛情嘅睇法。至於佢不羈、固執同自由嘅個性，我覺得呢一首歌就係《反對無效》嘅古代版！」談及8月19日於旺角麥花臣場館舉行的新碟發布音樂會，MC說︰「好開心有呢個idea，可以一口氣唱晒新碟入面嘅歌，令觀眾現場體驗一吓『Sweet & Sour』嘅感覺同知道呢張專輯究竟係咩一回事，亦都係一個同粉絲見面、接觸嘅好機會！」

（即時娛樂）