ViuTV最新真人騷節目--最熟悉的陌生人，係圍繞住香港演員嘅工人姐姐。
第一集就係講唐寧嘅工人--Muji。
佢喺節目入面提到，當初佢係冇諗過請工人，佢媽媽一直都有幫手湊對仔女。但係之後佢媽媽患咗坐骨神經痛，要住院，自己又要打工搵錢，逼於無奈就請工人姐姐。
因為唐寧係印尼華僑，所以就請翻個印尼姐姐，「話晒係同鄉嘛～」
佢一去到Muji屋企，即刻衝上去攬住Muji同佢仔仔Riski。佢攬住6歲Riski嘅時候，見到佢哭笑不得。佢就話：「我對住Riski就有種好複雜嘅感覺，對佢好愧疚，因為喺出世咁耐，佢同媽咪相處嘅日子唔夠100日。剩落嚟嘅2000幾日，都用咗嚟照顧我嘅仔女。」唐寧繼續講：「呢幾日短短嘅相處時間，我會當Riski係親生仔咁錫。」
當唐寧參觀Muji新起嘅屋嘅時候，佢又忍唔住眼濕濕。佢一直內疚，因為照顧自己嘅屋企人，而剝奪工人姐姐同仔女嘅天倫之樂。啱啱起好嘅屋，明明Muji先係間屋嘅主人，但係佢偏偏係最遲入住嗰個，甚至係今次翻印尼先見到自己間屋。
本身佢可以訓喺一個舒服啲嘅房，點知喺佢翻到嚟嗰陣，已經有人住咗。唐寧笑住咁話：「有樣嘢好搞笑～佢係暫住自己屋企。」但佢講呢句嘢嘅時候，係心痛住Muji，即使有咗自己間屋，都唔可以長住。連Muji 自己都話：「覺得自己係客人。」
不過同時佢又好感恩，因為Muji 一直都話想起屋，依家見到間屋喺度，好戥佢開心，因為佢終於完成咗人生其中一件佢想做嘅事。
參觀完屋企，Muji就帶唐寧感受家鄉生活。
透過同Muji+佢姑姐嘅對話，大概知道印尼嘅工作機會、婚姻係點。佢哋講到，大部分人畢業之後，都好難搵工，唯有到香港做工人。而喺印尼，普遍都早婚，姑姐話：「嗰陣我16歲，老公19歲，係奉父母之命結婚，唔敢拒絕。喺鄉下，16歲嘅時候係唔識自己搵男朋友。」
工人姐姐為咗湊人哋嘅細路，失去咗睇住自己小朋友長大嘅過程；同人哋嘅仔女關係好密切，但係同自己嘅仔女1年見唔到好多次；外傭對香港好多家庭都好重要，但係佢哋喺自己屋企嘅地位都無所替代。希望大家都好好對待自己嘅工人姐姐啦～
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0