試當真煮飯起火被消防處抽水　教冷靜應對可變高冷廚神｜Ray Online

YouTube頻道「試當真」前日喺4周年直播舉行《黑白大廚現場版》，不過竟然上演爐頭著火意外，好彩救得熄。消防處就「抽水」，教大家煮飯著火嘅應對方法。

消防處今日喺社交網站發文，標題係「試吓當你真係煮緊飯時起火】。咦，仔細睇吓，「試當真」三隻字就隱藏喺標題入面喎。消防處教大家，無論係用電磁爐定明火煮食，萬一起火，記住以下步驟，就係熄爐、熄電掣或者掹插頭；用鍋具蓋或者滅火氈冚住火種，直至熄滅。消防處提醒大家只要冚得夠實，火缺乏氧氣就會「窒息」。不過，滅火氈係防火物料，唔可以用其他毛氈代替㗎。

保持冷靜可做「高冷廚神」

消防處提醒大家保持冷靜，就可以做「高冷廚神」啦。仲順便賣廣告，叫大家留意消防處Facebook同Instagram，因為處方嚟緊會公布「社區應急先鋒計劃」詳情，教大家更多應急知識。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)