經過《飯戲攻心》既成功，《飯戲2》受到萬眾期待，但自上映以來評價好壞參半，入場後的確明白點解有咁唔同既感受。我會話如果想簡單睇套溫情片，依套係唔錯既選擇；如果滿心期待想睇套笑片，就應該會幾失望。
而我係偏向喜歡依部電影的。
(以下有劇透)
「每與你一起這心都很高興 能陪著你世界再沒悶事情」
故事用兩段婚姻戲做主線，以胡鬧搞笑包裝，推動角色間既關係，探討親情、愛情，歡樂中又有點窩心溫暖。配上賀歲片熱鬧喜慶元素，睇完係有種輕鬆、開心既感覺，喺海洋公園取景更係錦上添花。
當中有兩部分我特別喜歡。首先係一家人挺身而出為二佬擋鏡頭個段，即使有過種種磨擦衝突，但只要家人有咩事，大家一定會馬上奮不顧身地支持，完美演出電影對家人既詮釋。
另一段就係二佬最後深情剖白。即使係面對愛人，我地都總有啲事難以開口，生怕展露自己軟弱一面，但其實只要深愛大家，就會無條件地信任包容，唔會介意各自既缺點，萬大事定會在旁。佢地兩個真摰既感情睇到我眼濕濕。
我仲非常喜歡電影最後用《Together》做插曲，貼切地形容戲中兩段愛情。即使經歷多少高低起跌，只要有伴侶支持陪伴，生命就會因此而變得豐富精彩 。
「最愛是你生命動人因有你 我掛念你深夜達晨曦」
角色承接上集性格特色，並加以深化，演員火花更好又討喜，已經同角色融為一體，配角們亦成功帶出新鮮感。
張繼聰同Stephy依對情人依舊吸引，一個型一個靚，各有魅力，演繹令人睇得舒服 ；三佬同Josephine依對歡喜冤家雖然經常唇槍舌劍，但內心充滿愛，更加係搞笑擔當。
不過要數最搶鏡一定係林明禎，由上集感覺只係配角，同主角們有點隔膜，到今集已經打成一片，唔單止保留到可愛活潑演繹，感情戲亦演得動人。
配角中又以Jeffrey同米雪最突出！
作為《飯戲1》fans，可以見住依班家人成長係莫名地感動。
「仍最愛是你堅定自持因愛你 縱隔萬裏心跟你飛」
然而，依部電影無可否認地有唔少不足。
由於電影規模由一間屋變到兩場大婚禮，想討論既事以至角色都多咗太多，連配角們都有自己既故事，令篇幅變得唔夠分。劇情因而有點散亂，枝節太多，主題又唔夠清晰，令親情愛情線都表達得差少少，高潮部分亦營造得稍欠張力。
再加上無咗大佬依個角色，就好似少咗個靈魂咁，畢竟黃子華係神一般既存在。
只可以話《飯戲1》實在太出色，難免產生對比，令《飯戲2》顯得有點眼高手低，加上笑點無上集咁多，因此有唔少觀眾失望，非常可惜。不過我依舊認為《飯戲2》係一套不俗既作品。
「來甜夢中把臂 一起四飛分也一起」
總括而言，《飯戲2》雖然口碑未如人意，但台前幕後無需灰心，因為有唔少觀眾包括我都喜歡依部電影。《飯戲3》或者有啲難拍，但我期望依個團隊會再合作做全新既作品！
▼Follow hkpopculturelover
Instagram: https://www.instagram.com/hkpopculturelover/
留言 0