飲業界七折賀國慶 張宇人：優惠大咗㗎喇，你唔覺咋

【獨媒報導】曾在回歸推出「七一折」優惠的飲食業界，宣布在十一國慶推出「七折」優惠。自由黨張宇人聯同飲食界代表舉行記者會，他指香港人在長假期應多留港，又指深圳大灣區「人頭湧湧，無謂去迫」，又稱業界不關心生意額，「唔介意賺少咗，最緊要大家開心。」有記者問既然不睇錢，為何不提供更大優惠？張宇人說：「大咗㗎喇，不過你可能唔覺咋」，在場業界代表一片笑聲附和。

張宇人在記者會表示，業界從未試過以七折慶祝國慶，今次有1,750間食肆參與，業界氣氛「愈黎愈興奮，好多人支持」。除了叫市民「唔好執輸」，張宇人更認為「你唔去幫襯啲飲食業呢，尤其係畀折頭嗰啲，係你嘅損失」。他指部分食肆優惠持續至10月2日，呼籲香港人「長假期多啲留港，深圳大灣區人頭湧湧，無謂去迫」。

張宇人

稍後再公布如何配合夜市

他亦透露，餐飲業界現時正商討如何配合政府夜市，會留意政府如何「搞地區嘢」，屆時未必整個業界聯合提供優惠，但會組織商舖與地區商場合作。

有商場在過去周末在尖沙咀海濱搞夜市，被問飲食業界會否擔心被「搶生意」，張宇人表示最擔心的是「守冷檔」，「又無人，又無客，三五十人企喺度，真係好辛苦」，他指若果有生意，「走得好快隻腳唔會攰，企喺度隻腳會攰，講你都唔信」。對於K11開夜市，他表示整個業界很大，不介意做不到生意，「最緊要大家有個氣氛」，「唔係話（只）做起一個，淨係賣魚蛋有生意」。他又稱自己全力支持夜市，整個7月只有3日外出用膳，但9月開始至下月中，「得3日喺屋企食飯」。

有何特色留人？ 張：上次試唔哂，今次再試吓

有記者問業界推出什麼「特色嘢」吸引香港人，以及與大灣區城市競爭。張宇人表示「絕對有信心」內地旅客會訪港，不同城市間競爭「其實係好」，他認為愈多競爭，會令業界「去諗」不同服務水準和菜式。

至於有何「特色嘢」，張宇人表示今次與七一回慶優惠不同，有商戶全日全單七折，「大家樂上次個冬瓜盅無咗，咁你今次要去試下打邊爐。美心又有新嘢出，所以上次試唔哂嘅嘢，今次真係可以再去試吓」。

至於生意額，張宇人指參與的業界「唔介意賺少咗」、「唔會諗住賺大錢」。營業時間會因應地區而各有不同，難統一概括營業時間會否延長，他又指7月推行的兩次業界優惠，「唔係好多投訴」，不擔心市民對優惠有混淆。有記者最後問，既然錢不是考慮，為何不推出更大折扣優惠，張宇人就說「大咗架喇，你可能唔覺咋」。

大快活推29蚊頹食

部份餐廳提供的優惠包括，美心MX在10月1日提供酸菜湯米線及去骨海南雞七折優惠；大家樂在10月1日及2日，推出麻辣海鮮肥牛鍋七折優惠，要$68；大快活在10月1日及2日，午市及晚市提供粟米肉粒飯優惠價$29；麥當勞有$11買甜粟米批兩件；太興10月1日及2日，提供全日堂食七折優惠。

另外，港戲院商會聯同所有會員在十一國慶假期，提供全港戲院半價優惠，除了包場和特備節目外，當日所有票種都有半價。當日的戲飛會在星期三（27日）中午12時後，陸續在各戲院票房及網上售票網頁公開發售，每人每次最多購買4張戲票。