「對球隊嚟講，呢段時間真係好艱難，做決定成日猶豫。」遇上混沌一季，車路士隊內大哥之一嘅泰亞高施華（Thiago Silva）直斥其非，一啲都唔客氣：「一月簽咗成八個球員，我哋要停一停，規劃吓長遠策略，唔係嘅話，下季就好容易出錯。」
今季轉會窗，球隊花費超過5億英鎊，球隊喺支出上極為高調，但要成就一支有力爭標嘅球隊，唔係用金錢堆砌出嚟就可以。每場波只能從三十幾人裏面揀選十一個人出陣，總有啲球員冇得踢。「隊內有好多好出色嘅球員，但變相有啲球員一定會唔高興，因為唔係個個人都有機會上陣。」
而家季尾，嚟緊將會有尼昆古、古斯圖、山度士等等預購咗嘅球員加盟車路士，加埋幾個外借回歸嘅球員，車路士喺嚟緊嘅暑假將會有極多嘅球員。
以管理角度考慮，喺轉會市場大手出售球員，削減人手方便管理，同時滿足財政公平條例，似乎無可避免。而根據The Athletic嘅消息，有部份合約期限仲有幾年嘅球員，都想離隊尋求新發展，主因係佢哋喺球隊睇唔到前路，隊內咁多人手，保證唔到呢啲球員有穩定嘅出場時間。
另外，新班主保利入主之後新簽嘅球員，合約上都有「球隊失去歐聯資格，就要減薪三成」嘅條款，以今季車仔嘅情形嚟睇，呢班新球員肯定要減薪，更加加速佢哋離隊嘅意欲，被外隊壓價交易，亦係可以預想嘅事。
同時，新班主入主前嘅球員，合約上大多冇呢條條款，下季喺薪資待遇上嘅差距，會加劇隊內嘅心結。
「全世界都討論緊換領隊嘅事。我諗作為球員，我哋都有責任。」兩度易帥嘅背後，係更多深層次問題，恐怕一個轉會窗都唔能夠完全解決。施華繼續講：「我哋今季有三個領隊，加埋般奴（禾特斯）就係四個，但佢贏唔到波。跟林伯，我哋都贏唔到波。所有人嘅焦點都放喺領隊身上，但我哋要諗吓隊波真真正正做錯咗啲咩，然後作出改變。」
林伯特以代理領隊嘅身份回巢車路士，五戰皆敗北。誠然，以球隊今季嘅混亂情況嚟睇，呢五場敗仗顯然只係小事。收購極多新球員，但換嚟更艱難嘅管理，進而影響球隊成績，炒幾個多領隊都無濟於事，燒再多錢都係枉然。
留言 0