由鄭秀文（Sammi）﹑陸駿光和談善言等合演的《流水落花》現正上映中，男團MIRROR經理人黃慧君（花姐）亦驚喜客串。
製作組昨天（6日）在社交網貼出訪問花姐片段，原來今次是花姐首次拍戲，她坦言心情忐忑及感到大壓力，花姐說：「今次係我處女作嚟嘅，即係我嘅處女作就獻咗畀Sammi，我個角色就係士多老闆娘，導演（賈勝楓）聲稱我係好直率，同Sammi識咗好耐嘅朋友咁樣，我估點解佢（導演）會搵我呢？九唔搭八咁樣又未做過戲，點解佢會搵我？咁我通常就估，我諗佢都應該係要搵一個粗魯嘅肥師奶，但又唔係喎，我又覺得點解又會文縐縐咁喎，所以嚟之前，我係好大壓力㗎，我好驚導演叫我做賢良淑德嘅高貴女人，咁我就死喇，其實我應承嘅過程，我係好忐忑，我都有問MIRROR成員，我係咪應該咁樣做嘅，但係佢哋都話：『咪做囉，你得閒咪做囉﹗做嚟畀我哋笑下都好呀咁樣。』」
（即時娛樂）