由無綫自命「七線」藝人陳俊堅、鄭雋熹、程浩駿、林浩文和姚宏遠主持的新節目《七線人棄王》，不時都會邀請藝員朋友作客爆下娛圈花生事，近日林秀怡作客節目時，就爆料出埠拍節目曾有女藝人以「怕黑」為由主動問同行男士可唔可以「陪瞓」，最爆係女方更是名花有主，引來網民出動「調查」。
林秀怡爆料指當時出埠拍節目，同行女藝人因為驚自己一個人瞓，食完晚飯後就以「怕黑」為由在大庭廣眾下問同行男士可唔可以陪她瞓或去對方房間瞓，林秀怡對於女藝人行為表示：「我覺得呢個女仔曳曳，因為我本身識佢男朋友。好彩個男士係冇應承，不過就送咗佢返房，喺間房逗留咗一個鐘度就走咗。」之後主持們起勢追問女方男朋友是誰，但林秀怡就沒有透露。
節目出街後，網民都拎住林秀怡所提供的線索：「怕黑」、「有男朋友」及「曾與林秀怡出埠」來找出可疑人物，最後曾經背住男友謝東閔偷食人夫黎振燁的朱智賢有上榜，另外仲有陳嘉桓、歐陽巧瑩、邵珮詩、黃美棋、何佩瑜及陳芷尤等人。