有「白面古天樂」之稱的新人黎峻入行前是名專業化妝師，因帥氣外表吸引粉絲將其照片發放到社交網，一夜之間暴增逾兩萬人關注，更有記者慕名相邀受訪，從此他的生活不再平凡！今年3月英皇娛樂認定他是可造之材，透過互聯網聯絡，邀他加盟成旗下藝人，經過3個月專業訓練後即安排他闖影壇，手頭上已完成《分手專家》的拍攝，緊接再參與另一部戲的演出。
由化妝界轉走演藝路，黎峻最需要的除了膽識，更要有「銀彈」，他坦言：「當初都預咗要捱吓，好彩公司有工作畀到我，自己亦有啲積蓄。屋企有講過可以唔使畀家用住，但養到我咁大個，點都要照顧吓家人嘅。」知道自己起步比其他圈中新人遲，29歲黎峻明白要把握機會、急起直追：「我同自己講，希望5年內可以做到啲成績出嚟。其實我乜都想試，啱啱拍完愛情喜劇，可以挑戰吓動作戲就好喇。（想同邊啲前輩合作？）我好欣賞許光漢同古天樂。」
談到早前被公司安排往廣州及北京受訓，他笑說﹕「讀書之餘仲有入息，事關公司安排咗我做同學嘅化妝導師，當中嘅演戲、唱歌及跳舞訓練令我獲益良多，未試過喺內地留咁耐，但身邊冇乜朋友，學習可以專注啲。（拍攝『處男作』時，有冇畀導演鬧？）有調校我，記得其中一場戲嫌我唔夠惡，佢就教我應該點做。我有請台前幕後食糖水，大家合作得好愉快，多謝老闆（楊受成）畀機會我。」
記者打趣指他應該「好貪靚」，黎峻表示﹕「其實我鍾意畫畫，中學時有次同學畀啲化妝品我用，搽完真係靚仔啲，起碼冇咗黑眼圈，後嚟接觸多咗就覺得幾得意，於是咪報名學化妝囉。由基礎班開始到特技化裝，都做咗7年㗎，最開心由唔少客人變咗朋友，到依家都仲關心我。」
東網網站 : https://on.cc/東網Facebook專頁 : https://www.facebook.com/onccnews/
