15歲姚焯菲 被封為「國民初戀」，14歲已憑TVB唱歌比賽《聲夢傳奇》成為人氣王，開過演唱會，拍過劇﹐出席不少大型表演項目。她外表甜美，原來是遺傳自爸爸的優良基因。她爸爸姚輝文年屆50以上，但外貌好年輕。他擁有紐卡斯爾大學文學士學位，及卡迪夫商學院的工商管理碩士學位，現在擔任投資公司首席財務官（CFO）和常務董事，同時是美國註冊會計師，在行內好有名。網民對她的家人都好感興趣，昨日姚焯菲終帶爸爸首次接受上鏡訪問，講父女情。
姚焯菲不在意負評 Do姐大讚EQ高
昨日（24日），姚焯菲與爸爸到Do姐鄭裕玲主持的商業電台節目《口水多過浪花》做嘉賓。姚焯菲表示自己從未接受過歌唱訓練，後來因爸爸留意到《聲夢傳奇》招募，鼓勵她踏出第一步，故她才會鼓起勇氣報名參加歌唱比賽，當初也沒想過會入圍甚至晉級：「我諗咗好耐，因為我未參加過同無學唱歌，諗住我唔係太叻，報嚟可能第一輪就輸咗，之後就放膽去試一次。」被問到讓女兒參賽入行的原因，姚爸爸指平時駕車載接送女兒放學、上學時，會聽到女兒哼唱歌曲：「偷聽佢唱歌，都覺得佢幾有潛質。」他解釋想女兒汲取多點經驗：「除咗讀書之外，佢可以出出面攞番啲工作經驗，對佢人生都有好大幫助。」
被問到如何面對負評，她說自己不會留意，見到也不會在意：「之前一開始會睇，佢哋都係批評我唱歌咬字，專業嘅評論，提點我嘅會聽，但有時無理取鬧就會好快唔記得。唔開心嘅嘢，我唔會留喺個腦好耐，過咗幾分鐘再問我，我先會醒覺自己睇過。」姚爸爸在旁不斷點頭，很認同女兒如此成熟的做法，連鄭裕玲都大讚EQ高。
她自認音樂路上尚有不足，例如早前開演唱會，她留意到自己第一日只顧自己唱歌，沒有理會台下觀眾，雙方缺乏互動，其後才改善到。姚爸爸表示一家人有看畢女兒所有表演，他直言女兒經驗不足，會加以提點，也有介紹自己的唱歌老師給她。
另外，她想在這年內練習多點，嘗試跳唱，或者型格路線：「未試夠多風格，一直都係行得意，甜美路線。」鄭裕玲再大讚她有決心：「放咗嗰樣嘢為目標就會努力達到，呢樣非常之好。」
姚焯菲工作與粉絲都多 爸爸擔心跟到實
姚焯菲每天上學返七放四，放學就會去電視台拍攝新劇《青春本我》，或有其他工作在身，連星期六、日都要忙於工作，時間表排到密密麻麻。她指以前晚上9時就會上床睡覺，現在要延遲到凌晨12時：「會唔習慣，有時會攰。」鄭裕玲表示驚訝：「嘩無咩時間休息。」姚爸爸表示：「成日睇邊日係假期，追返啲瞓覺時間。」
如今她拍廣告又出碟，吸引很多男粉絲支持，她坦言突然有很多人關注自己，初時會不太習慣，後來才明白這是自己努力得來的成果；而姚爸爸就表示擔心：「都驚，所以我哋跟到足。」由於女兒未成年，姚爸爸要跟出跟入，照顧她，他指自己正職返朝九晚六，初時想低調，後來被報紙報導後決定公開身份，同事們都很支持。即使工作忙，他都會安排好時間，盡量抽空接送女兒出入，媽媽都會幫女兒換衫：「有時拍到好夜都會喺出面等佢，不過夜極都係11點。」他坦言辛苦不過值得：「一來佢自己鍾意，二來相處時間多咗，咁長車程會同佢傾偈。我同太太都幾投入，暫時掌握到。」他笑言經常跟炎明熹叔叔聊天，等待兩位小女生。
爸爸家教好 兩女聽話乖巧
姚爸爸希望女兒以學業為重，經常提點、叮囑她：「我都支持佢做歌手，但唔等於要放棄學業，最基本一定要有。我會嚇到話到時歌手都係大學畢業，佢就無。」慶幸她很懂事，承諾最低限度承諾讀完大學，她說自己有興趣讀工商管理系，跟爸爸的專業差不多：「可能佢哋講緊自己啲科目，我就問咩嚟…所以我想完成晒成個歷程先會出嚟做嘢。」
姚焯菲是大女，還有一個細兩歲的妹妹，同樣對唱歌、跳舞有興趣。為免偏心大女，姚爸爸表示大女有活動，都會帶細女去：「家姐學唱歌，細妹都會同一個老師學唱歌…家姐有外景都會載細妹去，等佢參與其中。」
網民讚姚焯菲同爸爸一樣有教養
很多網民讚姚焯菲爸爸教得好，令女兒跟她一樣受訪時談吐溫文爾雅，而且表達能力強，對答流暢：「一個好有教養內涵的爸爸，一個好聽話乖巧的女兒」、「小妹妹有禮貌，難得！」、「同Do姐傾偈過程全冇Dead air，有時睇大人訪問都未必可以好似佢咁，呢個妹妹犀利」、「她不亢不卑嘅態度令人激賞」、「爸爸好有修養，難怪教出咁好嘅Chantel」、「全家都咁優秀」、「姚爸有型，對答一流，唔怪之得Chantel 遺傳咗佢啲優點。」
他們又留意到父女之間很有愛，指姚焯菲回答鄭裕玲問題時，除了面向對方之外亦會不時面向爸爸，看爸爸有沒有補充，充分反映她尊重及重視爸爸。而且從父女眼神交流，充分看到他們的關係很好，父慈女孝，好溫馨。
留言 0