根據Fabrizio Romano嘅報導，車路士青訓球員路易斯荷爾(Lewis Hall)以外借形式加盟紐卡素，外借合約中有強制買斷條款，紐卡素需要係明年6月以2800萬鎊購入球員，並且有700萬鎊浮動條款，因此紐卡素其實係以總值3500萬鎊嘅合同簽下球員🙌🏻
現年18歲嘅荷爾出身於車路士青訓，過往由林柏特提拔上一隊，並係上季樸達執教時，聯賽盃對戰曼城嘅賽事正選上陣，但係初生之犢不畏虎，表現上並無怯場，並且有唔錯嘅表現，唯獨真係經驗有限，上季為球隊上陣12場並無入球同助攻，但出色嘅表現令佢成為車路士最佳青年軍球員，結束佢係車路士嘅最後一季。
實際上荷爾司職左閘位置，善於引球推進，並且速度高，控球技術同有一定防守能力，作為一個出擊型左閘可塑性相當高，難免紐卡素領隊艾迪賀維(Eddie Howe)會對佢如此鍾愛。
艾迪賀維亦係記者會上表示：「完成呢單交易後，將會結束球會今日夏天嘅轉會事務，除非有球員受傷，我哋先會再引入球員。」
如今紐卡素嘅左閘位置有丹般恩(Dan Burn)同泰格特(Matt Targett)，荷爾需要努力去佔一席位，但以其攻擊力相信好快能夠得到上陣機會，因為上季紐卡素嘅問題係攻力不足，丹般恩偏向防守屬性，泰格特只係一個不過不失嘅左閘，因此未來若然能夠睇到荷爾同右閘利華文圖嘅兩閘齊飛，紐卡素嘅未來都相當可怕🔥
▼Follow 足球港場
Instagram: https://www.instagram.com/footballarena_hk/