回顧過去一年，自己有認真投放心機和時間去準備渣打全馬，好多師兄喺大考前都有去其他地方走隻全馬，而我只係選擇繼續留港消費，希望全心全意做好渣馬，今年好幸運入選Team Asics，成為成員之一，隨之而來多了一個配速員光環，有人同我講過，這樣會打亂自己恆常練習時間表，但我上年渣馬後無好好調整，身體還沒恢復便繼續訓練，不經不覺埋下計時炸彈，終於喺一次間歇跑訓練後，傷了IT Band，人生第一次不能跑，就算慢跑都十分勉強，復康過程太長（下刪千字）就不在此提了。
復康期尾段有報不同10K賽事，成績都不能跑進Sub40，驚自己一旦去盡傷勢又會加劇，所以只是以一個跑時唔好再傷嘅心態完賽，當時狀態係經歷低潮時期。鑒於安份守己忍腳同努力進行復康治療，無諗過復原進展良好，喺進入渣馬倒數16週，慶幸及時跟上師兄們嘅萬金訓練列車，同時感恩雙腿無提出控訴。
渣馬倒數前一個月，有一場大美督美津濃半馬，路線是山路，好多上落斜，自己未跑過該路線，所以都是盡力做好就算，但教練豪哥講呢條地獄路線如果做到1:25內，就大機會喺渣馬做到sub3，所以我亳無保留盡情去，最後都無諗過自己喺地獄賽程做到1:24，為自己渣馬打下一支強心針。
但好景不常，當日天氣轉冷，正值流感高峰期，賽後亦不幸患上流感，足足用了十天時間休養，回想最後階段不能追隨訓練，還擔心會狀態一沉不起。
病癒後剛好轉換工作環境，好多事情需要處理，每日早出晚歸，平日休息時間都不夠，所以無奈停止跑步，只能在週六和日盡力做好tempo和長課，當中更有一日二課，沒跑嘅日子於工作時不斷負重上上落落，每日行幾百級樓梯，的確令我跑斜路有莫大幫助。但1月份嘅跑量依然慘不忍睹，身體質素無法令自己有信心喺渣馬跑出好成績，甚至擔心連順利完賽都做唔到。
渣馬當日，因為無預期做到好成績，出奇地一覺瞓到鬧鐘叫醒，本身好緊嘅背脊，經早一日拔罐後真係鬆好多（利申第一次拔），喺無乜壓力下連出門都過份輕鬆，因此攪到遲上線同熱身不足，所以當嗚槍後我差不多要用半分鐘才到起步線，加上勁塞人，頭1K只能走4:57，所以我更加隨心走。
之後基本無望手表配速，只係多咗留意週邊嘅景物，可能頭半程真係走自己，上斜時比以往有力同保持到配速，所以不經不覺喺幾舒服情況下走完半程（後睇返用咗1:30:28），自我感覺良好加上辛苦爬升路段只剩西隧，所以便毅然嘗試加速。
當時都係無諗過做時間，只係想盡情跑自己，喺22K開始嗰5K開咗10K pace嘅配速跑，之後喺一次小上斜時有感出酸便收返慢去跑，但仍可保持4:0X馬速，上到西隧都盡力上，但配速跌至4分2X，當時腦海都無計到自己夠唔夠時間，只想快啲跑到終點祝賀Sub3師兄們，喺少少進入隧道效應嘅情況下，我都無留意相機位置，所以今次我無乜中槍。
當跑到望見大會40公里塊牌時，我見距離大會9點仲有11分半鐘，我心諗只需維持5分半配速返到終點，我就可以成功Sub3，當刻當頭棒喝，即刻成個人「登」一聲醒返哂，立刻提步走飛奔往終點，喺經過銅鑼灣時，沿途聽到好多打氣聲叫加油，講返到終點就可Sub3做萬金，喺嗰刻諗都無諗過自己可以Sub3，最後終於衝過終點線，雙眼已經熱淚盈眶…
見到喺終點等候嘅師兄們，我已經淚如泉湧，回想大家一起艱辛團練，終於喺自己地方成功破三，百般滋味，盡在不言中。
Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/
留言 0