Bachalpsee（巴克普湖）又名「高山湖泊」，位於First（費爾斯特）行山徑上，雖小而景色絕美。瑞士有好多著名湖泊，當中有唔少要攀山涉水才可以到達，好似今次介紹嘅Bachalpsee高山湖泊，需要由First展望台一直沿住登山健行步行一小時才到達。鍾意行山運動嘅你，去到瑞士一定唔可以錯過行高山湖泊嘅行程。
Bachalpsee位於海拔2,265米高。湖泊所看到嘅係伯爾尼茲阿爾卑斯山脈（Bernese Alps），而當中最突出的芬斯特瓦山（Finsteraarhorn）在湖面平靜時更能清澈地看到倒影。夏天至秋天時段最為適合到此旅遊，因為冬季厚厚嘅積雪會將Bachalpsee完全覆蓋。
坐火車到Grindelwald站，到達後可選擇坐巴士（車程1分鐘）或步行約10分鐘到First纜車站。
纜車會慢慢爬升到海拔2,171公尺，車程約20分鐘，來回纜車費為30瑞士法郎（約230港元），持有Swiss travel pass可獲半價優惠。詳情可參考官網票價。
纜車到達終點First站，岀發到行山徑之前，可以先到First Cliff Walk by Tissot（懸崖天空步道）欣賞瑞士山峰壯麗景色。First Cliff Walk by Tissot是一條沿著山壁建造的懸崖步道，從透明的觀景平台眺望艾格峰（Eiger），挑戰一下膽量。
去過觀景台後，就開始岀發起行到Bachalpsee。行山徑路段平坦，沿途指示牌清晰，不少當地人都帶同小朋友一齊行山，可見係一條老少咸宜嘅行山路徑。
要注意下山纜車於每日下午4時半就會關閉，而通往湖泊步行需要一小時，務必預備逗留及回程步行時間。
經過一小時步行，終於見到很美嘅Bachalpsee，係時候靜靜地欣賞迷人景緻。如果想影順光嘅Bachalpsee湖，下午嘅光線最為適合，因為早上會背光，影山同湖會比較困難，呢個對團友係好消息，可以訓得足夠留力去行山睇湖泊。另外，建議帶備乾糧如朱古力，以補充行山消耗體力。
萬一發現Bachalpsee被積雪蓋住，無須擔心掃興而回，因為山上有好多活動選擇，例如高空飛索（First Flyer）、山景卡車（Mountain Cart），以及神鷹飛索（First Glider），樣樣都刺激好玩，係另類體驗。
First所有活動都有不同營運時間，如果想玩到以上活動的話，就要注意開放時間。有興趣的話，筆者建議買套票組合，因為所有套票都包含無限次乘搭First登山纜車的票價，而不用額外買纜車票，喺First區十分抵用。票價浮動不定，可先到官網考慮如何選購套票。First 官網
Bachalpsee
網站：https://www.jungfrau.ch/en-gb/grindelwaldfirst/lake-bachalpsee/
纜車開放時間：早上9時至下午4時半
瑞士基本資料
地理位置：位於歐洲中部多山的內陸小國
時區：比香港慢6小時
簽證：持有香港特區護照可免簽證
官方語言：四種官方語言，分別是德語、法語、意大利語和羅曼什語。
撰文及攝影：蘇兒（Zoe）
鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。
