續上回係關西機場訓左一晚，我坐巴士開始我紀伊半島第一站，朝早流流嚟到三重縣松阪市~
成晚無食野餓餓地，整個A5和牛做早餐先!!
Wa係咪咁串呀!!! 阿鋒你發左達ar??? 背包客走嚟食和牛!??
無錯!因為松阪市只係出名一樣野，就係牛!
傳說中日本首屈一指既 ----------------- 松阪牛!!!!!!
唔係呢隻ar!!!!!!!!!!!!!!!~~~~~~~
根據資料顯示，日本三大和牛為 : 神戶牛、松阪牛及近江牛(亦有說是米澤牛)，當中又以松阪牛最為強勁，而價錢亦都非常強勁!
不過原產地一定會係最新鮮同最平的，起碼會慳返運輸費ar~
一場嚟到，點都要試一試呢種位於世界最頂尖既牛肉既!
網上做完功課，松阪市內幾乎公認最佳的松阪牛食肆為「和田金」及「牛銀」
呢一金一銀以壽喜燒sukiyaki馳名，亦店如其名以吸盡你既金銀馳名，對於不嗜甜又欠金銀既我嚟講絕對non of my business
靚既牛都係炭火燒係最好，所以我既目標就係三重縣既連鎖烤肉餐廳，以性價比高聞名既「一升」總本店
但佢地營業時間最早都係11:00，普通朋友日常可能已經磨刀霍霍向爹娘準備lunch，但對放假中既我嚟講呢個時間真係早到嘔，所以本篇”早餐”呢個標題係唔係昆人就見人見智啦~~~~
店內地方不大，油煙亦非常重，但我就係鐘意呢一種風情風味，呢d小店式格局先係有料到ar~~
店員大多不懂英語，但一如日本慣例非常殷勤地招待你
正如上面所講，一場嚟到，無理由唔試下最高級既松阪A5和牛掛!
而且係度完全唔使擔心食到假野舢舨充炮艇，因為每份A5和牛都有標籤註明養育地、邊個牧場、發行商及邊日歸西，絕對係信心既保證
好多人嚟”一升”都會選擇要佢既5000yen和牛烤肉套餐，有A5、赤身、牛什拼盤及蔬菜
但我計計條數，赤身同蔬菜我都無乜興趣，單點其他野價錢都差不多，所以我既早點菜單就有A5、厚和牛舌及牛小腸，當然啤酒同白飯係唔少得ga la~
- 厚和牛舌
老實講係好好味的，又爽又滑，味亦比普通既香濃，之不過又未係好味到會爆衫或彈上屋頂果隻，係香港都可以食到既味道，又或者燒牛舌既極限已盡於此。
- 牛小腸
油脂甚豐，脆身，但基本上咬唔開，我第一次食，唔知係唔係正常啦
- A5和牛
主菜嚟啦!!!! 期待已久的世界最頂級牛肉A5和牛!!!!
2500yen就係咁兩件少女手掌心大小及食指咁厚既粉紅白色迷彩長方塊，但真係睇到都覺無得頂!!!
和牛放在炭火上輕輕一灸，肉色轉迅變得灰白，被鐵網烙出縱橫不一的漂亮花紋，油脂一點一點滴下，連帶輕煙和香氣，發出滋滋的聲音…….
好，偽文青既作狀說話就到呢度為止~
燒到5成熟中間粉紅，一啖咬落去，滑到幾乎唔使咀嚼，會係口腔內直接溶化!
牛味唔算真係好濃，但好香!真係好香! 但又唔係只食肥膏果種油膩，可以話係充滿牛味既滑豆腐!
讀者可能會話，呢兩塊咁既肉片，打邊爐嫌厚煎牛扒嫌薄，竟然要2500yen??? 當6.5匯率都要$162會唔會太過份ar??
唔過份~~~當你知道係香港，1塊索價$1700港幣，仲要係2014年既價格時，分分鐘妳會大叫 :「小二!嚟多兩碟!!」
但我一碟已經夠哂數~而且銀包都無咁豐厚……
唉大鑊了……..以後食唔返點算……………..
一輪風捲殘雲，不論味覺、視覺同聽覺都得到左最佳享受，咁就係時候小二埋單了~
61xxyen……….我除左去婚宴外從未食過咁貴一餐，享受過後果然係痛苦ar……….
一生起碼豪一次，算啦
食飽左啦，咁松阪有咩玩呢~
咁就要講返我嚟呢處既原因了。
其實當初我揀三重縣呢個交通唔方便又山卡啦既地點，表面目的係為左貫切一直以來的「開發少人去的旅遊地點」，但真實原因，根本就係三重縣松阪市係我最愛偶像既出生地!
鐘意果個人自然就想接近佢多d認識佢多d，所以根據毒男心態，我毫不猶豫就選擇左呢度為我輕輕鬆鬆放大假活著viva的目的地，之後先慢慢再plan周邊有咩地點值得去玩~
究竟係d咩人傑地靈既地方先可以誕生到一位如此人靚聲甜又完美的偶像呢?
更重要既係身處其中，踏足於佢行過既道路、用膳於佢食過既餐廳……..精神上會覺得同佢close好多好多……….
真係不能不講一句-- -- -- -媽，好毒呀!
但到而家完成個trip後，係完全無一絲既毒氣存在ge，反而異常精彩(我覺得)~
既然原本目的係為左我愛既人，第一站當然就要嚟到佢既故鄉啦~
三重縣松阪市~~~妳究竟有幾特別呢~~~~~~~~~~~~~
係一d都唔得別ga…………開頭以為周街都會係我女人既歌曲同海報，仲會有代言宣傳，但估唔到係乜都無law……..
松阪市已經係三重縣比較重要既城市，但依然係人煙稀少，星期五早上充其量只有數間店鋪在營業
最有名的松阪城遺址亦只係一堆空地，但都有少少feel ge
而個feel就係步於石階之間時有三國無雙攻城侵略既感覺，忍唔住講返句”敵將! Is Doctor Lee!”
至於點解日本古城會有中國三國時代既感覺………….唔好問我……….
原本浪漫地(劇毒地)踏足愛人既步伐，竟然變左殺風景既燒烤肉食，唉點解我嚟松阪既目的會完全轉哂ga….…….
既然尋尋覓覓都找不到，亦不宜在此磨爛蓆，向今日第二個目的地出發吧啦
下回繼續~
p.s. 我食完呢餐飯後瀉足全日，唔知關唔關太油膩事呢………
============================
- 原文旅遊Blog :
- Instagram :
https://www.instagram.com/fung_garcia_backpacker/
- Youtube Channel :
鋒加西亞 / 旅人瘋語 (更新左啦!)
- MeWe :
https://mewe.com/p/fung_garcia_backpacker
- Facebook Page :
www.facebook.com/Garcia.in.Germany
- Email :
funggarcia@gmail.com