歌手李克勤將於5月13至16日假紅館舉行《弦續李克勤‧港樂演唱會》,演唱會門票明日公開發售,最近克勤非常忙碌,剛由新加坡、曼谷等地演出回來,即開工為演唱會籌備及開會。他表示今次這個演唱會,可以說是聯合國式音樂及友情上大交流,因為香港管樂團的朋友,來自五湖四海,首籍指揮是菲律賓人,吹小號是泰國人,另外又有英國,法國、及日本、香港等樂手。
近日大家不斷開會及進行演唱會內容籌備工作,克勤表示第一次做演唱會,籌備工作如此歡樂:「我同菲律賓籍總指揮謝拉特.莎朗嘉 GERARD SALONGA開會,地點係哥爾夫球場,一路打波一路傾音樂,呢幾年好少有時間落到場打哥爾夫,所以嗰日真係開心到不得了,同埋好意外,佢唔止叻音樂,佢打哥爾夫都一樣咁叻。然後同圓號(Horn)李少霖及李太胡淑徽一齊上山頂,佢兩個嘅愛情故事,直頭可以用來拍部戲,兩個係遠距離戀愛始祖,十幾年來談情係靠書信神交,佢哋有問我有冇寫過情信畀老婆,我話梗係有啦,佢哋互相寫咗幾百封情信,我重有寫過情歌《妳是我的太陽》送畀老婆添。」
這班管樂大師之中,克勤表示最搞笑是首席吹小號(Principal Trumpet)的巴力勛Nitiphum Bamrungbanthum,他說:「佢係泰國人,佢帶咗我去試香港最地道嘅泰式按摩,走嗰陣,佢叫我同按摩講,tell那媽….我問佢做咩叫我鬧人,佢話泰文tell那媽係下次再來、下次再見咁解…笑到我眼水標。」
問到克勤點解開會不是正正經經,而是周圍開,聽落似玩多過做,克勤說:「唔係,去呢度嗰度,其實係會拍一些特別嘅影片,到時喺演唱會中穿插,為觀眾帶來歡樂,保証大家會覺得好得意,好好睇,至於當中係咩就入場先知。而舞台今次設計都係非常之特別,希望大家入場會有驚喜。」早前個唱優先訂購,火促爆滿,會否再加場?克勤表示一切看場地檔期及公司安排:「我淨係知我老婆最想我加場,因為佢負責接所有朋友訂飛,佢日日同都好緊張我講,你公司會唔會唔夠飛㗎,太多人落飛,驚到時冇飛得罪朋友。」
東網網站 : https://on.cc/東網Facebook專頁 : https://www.facebook.com/onccnews/
留言 0