闊別英超三年半，前熱刺主帥普捷天奴（Mauricio Pochettino），而家被傳出會係車路士嘅下一任主帥。
車路士單季內兩度換帥，而家由名宿林伯特暫時領軍，接手5場波，車仔輸足5場波，球隊已經無力爭取排名，但求用剩低嘅賽程嚟磨練默契。林伯特回巢教埋季尾，但大家都心水清林伯有幾多斤両，請佢返嚟無非都係暫時穩定軍心，協助球隊過度到新領隊執教之時。
已經有一年時間賦閒在家，普捷天奴正為呢個機會磨拳擦掌。佢之前執教過熱刺一段長時間，喺低成本之下，造就出一支能夠保持英超前列嘅球隊，成就先前嘅英超「BigSix」時代。阿里、簡尼、呢啲少年時代名不見經傳嘅球員，喺普帥手下進化成一支強隊正選。
對下，普帥擅於解放球員潛能，同球員坦承溝通，令球員信服自己嘅意念，將士用命打好每一場波。但對高壓戰術嘅追求，令車仔有部份球員可能得唔到上陣機會。
對上，於新班主保利領導嘅管理層，杜曹都曾經明示暗示，呢個美國佬根本唔識英國波。新請返嚟嘅樸達手執一批自己唔想要嘅球員，令佢好難發揮。而對於領隊權力有一定要求嘅普捷天奴，又會唔會同保利喺管理概念上有嚴重嘅衝突呢？呢一點係能否普帥可唔可以上車嘅關鍵，始終保利嚟到車仔一年鬆啲，已經炒咗兩任主帥。
至少，2019年比熱刺炒魷魚之前，普捷天奴都冇公開批評過班主利維，雖然大家都知熱刺高層嘅「度縮」係令球隊冇辦法更上一層樓嘅主因。喺PSG執教嘅短短一年半，普捷天奴同班主艾加拉費，關係都大致良好。
回想十幾年前，普捷天奴執教生涯之初，第一隊波就係自己球員時代效力多時嘅愛斯賓奴。當期時球隊正深陷降班漩渦，但普帥上任半季就幫隊波打上第8位，中間仲打贏過當時如日中天嘅巴塞隆拿。普捷天奴強調高壓嘅戰術架構，喺呢個時候已經成形。
而家嘅車仔，同樣係前路茫茫，先唔計今季兩個轉會窗嘅揮霍令球迷有幾心痛，戰術上都係一片模糊。杜曹遺留落嚟嘅三中堅，樸達有承襲同改進，但效果不如人意，樸達最後幾場波嘅三中堅，各球員定位根本唔明朗。而而家林伯特幾場波不斷變陣，默契上更加難以適應。
但誠如上文所言，球隊已經無力爭取排名，季尾嘅重點係重拾戰意，比下一任領隊順利交接。
留言 0