「試當真」女神陳苡臻（Jessica）多次被指有偶像包袱，唔似得其他頻道女成員會犧牲靚女樣為節目扮阿婆、扮外傭。不過最近Jessica竟然在新影片《喺香港同情人真係好L煩》有新突破，以行乞阿婆形象示人，令網民非常驚喜。
片入面見到Jessica著住招牌阿婆花花衫兼化個污糟妝飾演「賣身葬父」的年老乞丐，不過就手執iPad，用帶有鄉音的廣東話叫路人Payme課金，非常頂癮，新片出街後網民都大讚Jessica扮阿婆有一手，仲話期待她跟牙慈切磋，亦有人表示「幸好有Ca姐突破演出，個like俾佢嘅。」
不過片尾部分，Jessica與The Low Mays就突然指住觀眾發火表示：「你哋冇嘢做㗎咩？成日喺度上網！你冇工作冇屋企人㗎？冇拍拖，單身嘅，係咪？Mind your own things！」、「仲睇緊『屎當真』，唔係啩？冇Taste！」The Low Mays亦恥笑觀眾被試當真呃時間好慘，更疑似寸Haters直言：「你阿爸阿媽一定對你好X失望！」
雖然二人只想搞笑，但有觀眾似乎唔受落，批評二人為鬧而鬧不好笑，有支持開頻道的觀眾亦因為無故「中槍」而感侮辱，釀成小型公關災難，有人更表示會取消訂閱。
