加拿大女足使用無人機打探軍情 領隊、分析師、助教通通被紅牌出局

喺上屆拎咗奧運女子足球隊冠軍嘅加拿大，喺近日被指控利用無人機偷拍敵方新西蘭隊嘅訓練，結果就被國際足協重罰，加拿大女足嘅領隊，球員分析師同助教亦冇得留低啊！隨住事件越掘越深，仲發現咗原來加拿大女足上屆奧運已經有出術？

加拿大女足嘅助教Jasmine Mander同球員分析師Joseph Lombardi喺上星期被指控使用無人機偷拍新西蘭嘅訓練過程，國際足協裁定佢兩個違反公平競賽原則，被禁賽一年，另外連自稱對事件唔知情嘅加拿大女足主帥同樣被禁賽一年。連帶受罰嘅唔只佢哋，球隊喺巴黎奧運亦被扣6分，無疑對加拿大女足出線造成好大嘅壓力。球隊主帥表示為呢件事感到抱歉，但就認為扣分對球員好唔公平，不過加拿大亦有保留向體育仲裁庭提出上訴嘅權利。

隨住事件越鬧越大，加拿大奧委會調查嘅時候發現女足團隊喺上屆東京奧運已經有使用無人機窺探敵情，加拿大奧委會表示將會對加拿大足球協會嘅工作人員進行倫理培訓，防止再有同類事件發生，而嚟緊嘅比賽將會由助理教練Andy Spence帶領加拿大女子足球隊。犯規嘅兩位工作人員確實係欠缺體育精神，希望各國都可以以此為鑑，努力維持比賽嘅公平性，咁樣先係對運動員最大嘅尊敬。

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/